Rossiyada koronavirus bilan kasallangan 150 mingga yaqin bemor kuzatuv ostida, deya xabar berdi Rossiya Sog‘liqni saqlash vazirligi rahbari Murashko. Birgina Moskvaning o‘zida bir sutkada 2200 ga yaqin yangi koronavirus infeksiyasi holati aniqlangan.

Rossiyada kovid bilan bog‘liq jiddiy vaziyat saqlanib qolmoqda. «Bugungi kunda ushbu tashxis bilan 150 mingga yaqin odam mamlakatimizning barcha burchaklarida kuzatuv ostida, shuning uchun masala biz uchun dolzarbligicha qoladi», dedi Rossiya sog‘liqni saqlash vaziri Mixail Murashko 18 mart, shanba kuni Sechenov.Pro-2023 Butunrossiya ta’lim forumi chog‘ida.

Uning so‘zlariga ko‘ra, Rossiya hozirda virusning o‘zgaruvchanligini kuzatishda davom etmoqda. Operativ shtab ma’lumotlariga ko‘ra, koronavirus infeksiyasining kunlik o‘sishi 13 mingdan ortiq holatni tashkil etgan. 

Birgina Moskvaning o‘zida o‘tgan kun davomida 2195 ta yangi koronavirus infeksiyasi holati aniqlandi. Bir kun oldin 1734 kishi kasallangani haqida xabar berilgan edi. Shunday qilib, Moskvada kunlik o‘sish 450 dan ortiq holatni tashkil etdi. Kun davomida 144 kishi koronavirus bilan kasalxonaga yotqizildi, oltita o‘lim holati qayd etildi. Bir kun avval 7 kishining o‘limi haqida xabar berilgan edi. 

Umuman olganda, Moskvada pandemiya davrida 3 456 474 ta koronavirus infeksiyasi holati qayd etilgan va 48 366 kishi vafot etgan.