Rossiya prezidenti Vladimir Putin va bolalar ombudsmani Mariya Lvova-Belova Niderlandiyaning Haaga shahrida joylashgan Xalqaro jinoyat sudiga (XJS) ekstraditsiya qilinmaguncha xalqaro sanksiyalar bekor qilinmaydi. 

Bu haqda AQSh Davlat departamenti qoshidagi Global jinoiy adliya idorasini boshqargan sobiq elchi Stiven Repp The New York Times nashriga bergan sharhida aytib o‘tdi. Uning ta’kidlashicha, XJS qarori Putinni «quvg‘indiga» aylantiradi. 

«Putin qayerga bormasin, unga doimo hibs xavf soladi. Bu hech qachon yo‘qolmaydi», dedi Repp. 

Bundan tashqari, uning so‘zlariga ko‘ra, Rossiya sud qarorlarini bajarmasdan turib, xalqaro sanksiyalarni olib tashlanishiga erisha olmaydi. 

Reppning ta’kidlashicha, Putin oxir oqibatda xuddi boshqa harbiy jinoyatchilar kabi Haagaga keladi. «Aks holda, Putin ushbu order boshi uzra osilgan holda o‘ladi», dedi u. 

Bir kun avval Xalqaro jinoyat sudi Putin va ombudsman Mariya Lvova-Belovani hibsga olishga order bergan edi. Ular ukrainalik bolalarni majburan deportatsiya qilishda ayblanmoqda. 

Rossiya allaqachon qaror tan olinmasligini va Putin xalqaro sudga ekstraditsiya qilinmasligini bildirgan. Moskva haqiqatan ham Rim statutini ratifikatsiya qilmagan. 

XJS bosh prokurori Karim Xon sud qarorini «tarixiy» deb atadi, chunki birinchi marta BMT Xavfsizlik Kengashiga a’zo davlat prezidenti jinoiy javobgarlikka tortilishi mumkin. 

Biroq, ekspertlar yaqin kelajakda Putinni javobgarlikka tortishda sezilarli natijalarni kutmaslik kerak degan fikrda.