AQSh uchuvchisiz samolyotlarining Qora dengiz ustida parvozlarini qayta tikladi. Bu haqda Reuters xabar berdi. Avvalroq, Qo‘shma Shtatlarning MQ-9 Reaper droni bilan Rossiyaning Su-27 samolyoti Qora dengiz ustida to‘qnashgach, parvozlar to‘xtatilgan edi.

17 mart kuni mintaqaga RQ-4 Global Hawk droni yuborilgan, u Ruminiya havo hududidan 16 km balandlikka ko‘tarilgan va Qrimning janubi-sharqidagi xalqaro havo hududida parvoz qilgan. Agentlik suhbatdoshlaridan biri bu Rossiya qiruvchi samolyoti bilan sodir bo‘lgan voqeadan keyin dronning birinchi parvozi ekanini ta’kidlagan.

Biroq, CNN xabariga ko‘ra, AQSh avvalroq MQ-9 halokatga uchragan joyga o‘z dronini yuborgan edi. U yerda Rossiya harbiylari dron bo‘laklarini izlagan.

Rossiya qiruvchi samolyoti va AQSh droni bilan mojaro 14 mart kuni sodir bo‘ldi. Su-27 samolyoti MQ-9 Reaper droni parrakiga urildi. Oqibatda, AQSh harbiy-havo kuchlari o‘z dronini Qora dengizning neytral suvlariga cho‘ktirishga majbur bo‘ldi. Rossiya Mudofaa vazirligi MQ-9 boshqaruvni yo‘qotib, dengizga qulagani va cho‘kib ketganini da’vo qildi. Pentagon ma’lumotlariga ko‘ra, Rossiya qiruvchi samolyotlari dron parrakiga urilishdan oldin unga ataylab yoqilg‘i sepgan.