Руанда пойтахти Кигалида ўтган конгрессда илк марта 48 жамоа иштирокида ўтадиган 2026 йилги мундиал формати тасдиқланди. Футболдаги энг нуфузли турнир 1930 йилдан бери ўтказилади. 23-маротаба ўтказиладиган навбатдаги мундиалдан унинг формати ўзгаради.

Дастлаб жамоаларни 3тадан 16та гуруҳга бўлиш режа қилинганди. Аммо ФИФА бу ғоядан воз кечиб, 4та жамоадан иборат 12та гуруҳни маъқуллади. Гуруҳларда дастлабки икки ўринни эгаллаганлар ва 3-ўрин соҳибларидан энг яхши 8таси 1/16 финалга йўл олади.

Жами 104та ўйин ўтказилади (32та жамоа иштирок этганида 64та ўйин бўлган). Турнир 39 кун давом этади. 

Эслатиб ўтамиз, 2026 йилги мундиал АҚШ, Канада ва Мексикада бўлиб ўтади. 

Маълумот учун, охирги жаҳон чемпионати 2022 йил Қатарда ўтказилди ва у 32та жамоа иштирок этган сўнгги мундиал сифатида тарихга муҳрланди.