Vengriyadan O‘zbekistonga 1800 dona bankomat olib kelingan

Iqtisodiyot 23:54 / 11.03.2023 36012

Prezidentning 2022 yil aprel oyidagi qaroriga asosan, Xalq banki Markaziy bank bilan birgalikda 2022 yilning 1 oktyabriga qadar xorijdan 1 800 ta bankomat olib kelishi kerak edi. Bu bankomatlar hududlar, shu jumladan, olis tumanlarda o‘rnatilishi reja qilingandi.

Kun.uz Uzcard va Humo integratsiyasiga oid qaror qabul qilinib, bu chora bankomatlar joylashgan nuqtalarni ko‘paytirishga yordam berishi aytilganidan keyin, oldin qabul qilingan qaror ijrosi avval qanday bo‘lgani bilan qiziqdi.

Xalq banki matbuot xizmatining bizga ma’lum qilishicha, 2022 yil 29 martdagi 20220207-sonli shartnomaga asosan Xalq banki tomonidan Markaziy bank bilan hamkorlikda “SPECTRUM Security Safety Kft” tashkiloti orqali Vengriyadan bozor narxida 1 800 dona bankomat olib kelingan va hududlarga to‘liq o‘rnatilgan.

“Ushbu bankomatlar NCR zavodida ishlab chiqarilgan bo‘lib, 1 500 donasi NCR 6623 (cash out) va 300 donasi NCR 6683 (cash in/cash out, recycling) rusumida.

Ushbu olib kelingan 1 800 dona bankomat bilan «Xalq banki»ning jami bankomatlari soni 3 111 taga yetdi. Bu olis hududlardagi aholini ham naqd pul bilan ta’minlashga xizmat qilmoqda”, – deyiladi xabarda.

Qo‘shimcha qilinishicha, O‘zbekiston bozorida Xalq banki bankomatlari soni jami bankomatlarning 35 foizini tashkil etadi.

“Xalq banki” mas’ullarining tushuntirishicha, prezident qarori qabul qilinishidan oldin (08.04.2022) bankomatlarga ehtiyoj borligi bois, xorijdan bankomatlar olib kelish bo‘yicha ishlar boshlangan. Shu sababli shartnoma mart oyida tuzilgan.

Avvalroq, O‘zbekistonda bank kartalari soni 34 million donaga yetgani ma’lum qilingandi. Oxirgi 4 yildagi raqamlarga qaralsa, 2022 yilda bank kartalari soni eng tez o‘sganini ko‘rish mumkin.

Markaziy bank ma’lumotlariga ko‘ra, bank infratuzilmalari, turizm hamda boshqa obektlarga o‘rnatilgan bankomat va infokiosklar soni 57 foizga oshib, 2023 yil 1 yanvar holatiga 20,4 mingdan ortiqni tashkil etgan.

Ko‘proq yangiliklar: