Халқаро бокс ассоциацияси (IBA) россияликлар ва беларусликлар туфайли жаҳон чемпионатини бойкот қилишга чақирган федерациялар раҳбарларига қарши интизомий иш очди.
«IBA Мустақил этика қўмитасига АҚШ, Канада, Чехия, Швеция ва Янги Зеландия бокс федерациялари вакиллари устидан IBA Конституцияси ва унинг Интизом ва ахлоқ кодексини бузганлиги учун шикоят келиб тушди», дейилади хабарда.
Жумладан, АҚШ бокс федерацияси бош директори Майк МакЭти, Канада бокс федерацияси президенти Райан О'Ши, Чехия бокс ассоциацияси президенти Марек Шимак, Швеция бокс ассоциацияси раиси Пер-Аксел Сиоҳолм ва Янги Зеландия бокс федерацияси президенти Стив Хартлига нисбатан интизомий иш очилган.
Шунингдек, Мустақил этика қўмитаси бошқа миллий федерациялар мансабдор шахсларини бойкотдаги ҳар қандай ролини текширишини маълум қилди.
Қайд этилишича, шикоят 2023 йил март ойида Ҳиндистонда бўлиб ўтадиган аёллар ўртасидаги жаҳон чемпионати ва май ойида Тошкентда ўтказиладиган эркаклар ўртасидаги жаҳон чемпионатини бойкот қилиниши билан боғлиқ. Номи тилга олинган федерациялар ушбу мусобақаларда Россия ва Беларус боксчиларининг иштирок этишига рухсат берилгани, шунингдек молиялаштириш тизими шаффоф эмаслигини айтиб турнирни бойкот қилишган эди.
«Халқаро бокс ассоциацияси (IBA) ўзини ва барча федерацияларни айрим шахслар томонидан етказиладиган ҳар қандай зарардан ҳимоя қилиш учун қўлидан келган барча ишни амалга оширади. Боксда камситишнинг ҳар қандай кўринишига ўрин йўқ ва IBA буни ўзининг миссияси деб билади. Бундан ташқари, IBA ўзининг яхлитлиги ва обрўсини ҳимоя қилади ва ҳеч кимнинг ахлоқсиз хатти-ҳаракатлари туфайли зарар кўришига йўл қўймайди», дейилади хабарда.
Мусобақаларни бойкот қилган федерациялар ва мансабдорларга қарши қандай чора кўрилиши хабарда келтирилмаган.
2022 йил кузида IBA россиялик ва беларуслик спортчиларни изоляция қилиш бўйича ўз позициясини тубдан ўзгартириб, Украинадаги уруш бошланганидан кейин уларга нисбатан киритилган барча санкцияларни бекор қилган биринчи (ва ҳозирча ягона) йирик спорт ташкилотига айланди. Жумладан, ҳар иккала мамлакат боксчиларига ўз байроғи ва мадҳияси билан мусобақаларда иштирок этишга рухсат берилди. Бу билан IBA Халқаро олимпия қўмитаси (ХОҚ) тавсияларига зид йўл тутди ва у билан муносабатларини янада ёмонлаштирди. Жумладан, ХОҚ 2022 йил февралида Украинада уруш бошланганида барча халқаро спорт федерацияларига мурожаат қилиб, россиялик ва беларуслик спортчиларни ҳар қандай мусобақадан четлатишни тавсия қилган эди.
IBA президенти, россиялик Умар Кремлёв ХОҚ талабини бажариш ниятида эмаслигини айтди. Жумладан у «ҳар бир спортчига ўз мамлакати байроғи ва мадҳияси остида иштирок этиш имкониятини бериш учун курашишга» ваъда берди ва «спортчиларни бундан маҳрум қилган мансабдорлар ва сиёсатчиларнинг спортда ўрни йўқлигини» таъкидлади.
