«Энфилд»да ҳашаматли спектакл қўйиб берилди — 2:5.

«Ливерпул» — «Реал» 2:5
Голлар: Нуньес (4), Салоҳ (14) — Винисиус (21, 36), Милитао (47), Бензема (55, 67).
«Ливерпул» – Алиссон, Александер-Арнолд, ван Дейк, Гомес (Матип, 73), Робертсон, Байчетич (Эллиотт, 85), Ҳендерсон (Милнер, 73), Фабиньо, Салоҳ, Гакпо (Фирмино, 64), Нуньес (Жота, 64).
«Реал» – Куртуа, Карваҳал, Рюдигер, Милитао, Алаба (Начо, 27), Модрич (Кроос, 87), Валверде, Камавинга, Бензема (Асенсио, 87), Винисиус, Родриго (Себальос, 81).
Огоҳлантиришлар: Винисиус (60), Эллиотт (90+3).

Тўққиз ой ўтиб

Ўтган йилги Чемпионлар лигаси финалидан буён тўққиз ой ўтди. Бу вақт ичида «Реал» кучсизланмагани аниқ, «Ливерпул»ни эса Париждаги ўша мағлубият бутунлай чўктириб юборгандек. Ноябр ойида, қуръа ташлаш маросими ўтказилганида кўпчилик амалдаги чемпион финалчини осон мағлуб этишини тахмин қила бошлади — қизиллар ўшанда АПЛда ўнинчи ўринда эди ва «Лидс» ҳамда «Ноттингҳем Форест»га ютқазганди, «Барселона»ни енгганди.

Қишга келиб ҳам кўп нарса ўзгаргани йўқ. Мадридликлар клублар ўртасидаги жаҳон чемпионатида ғолиб чиқишди, инглизлар эса барча ички турнирларни тарк этишди ва АПЛнинг уч ўйинида ўртамиёна жамоалардан учтадан гол ўтказиб юборди — «Вулверҳэмптон», «Брайтон» ва «Брентфорд». Мухлислар ижтимоий тармоқларда Юрген Клоппнинг истеъфосини талаб қила бошлади, ҳолбуки германиялик мутахассис ўз номини абадийлаштириши мумкин эди — «Ливерпул» совринлар бўйича покер қайд этишга жуда яқин турганди.

Мезбонларнинг идеал старти

Ҳозир эса мерсисайдликлар мавсум ўртасига келиб мавсумни совринсиз якунлаши деярли аниқ бўлиб улгурган — фақат Чемпионлар лигасида назарий имконият сақланиб турганди. Ва бунинг ҳам ижобий томони бор: тўртта турнирда кураш учун максимал эътибор қаратиш осон бўлмасди, бу ўринда эса танлашга ҳожат йўқ. Эҳтимол, айнан шу «Ливерпул»нинг ўйинни ажойиб бошлашига таъсир қилгандир.

«Реал» камдан кам ҳолларда иложсиз ҳолатда қолади, аммо «Энфилд»даги дастлабки 15-20 дақиқаликда мадридликлар ўйинини бошқача таърифлаб бўлмасди. Карло Анчелотти жамоаси умуман ўйинга кириша олмади. Жароҳат олиб сафдан чиққан Кроос ва Тчуаменисиз майдон марказида тартибсизлик ҳукм сурарди — Камавинга умуман босимга дош бера олмади ва дебютдаёқ бир неча қўпол хатоларга йўл қўйиб улгурди. Чап қанотда эса Алаба Салоҳнинг темпига улгура олмади, бўлим ўрталарида эса жароҳат олди — унинг ўрнига ўнг оёқда ўйновчи Начони туширишга тўғри келди.

«Ливерпул» эса майдонда тўлиқ ҳукмронлик қиларди. 4-дақиқада Салоҳнинг пасидан кейин Нуньес товони билан чиройли гол уриб ҳисобни очди. Кейин эса Муҳаммаднинг ўзи қулай вазиятни йўққа чиқарди, аммо кўп ўтмай Куртуа даҳшатли хатога йўл қўйди. Париждаги финал ўйинининг сўзсиз қаҳрамони бўлган дарвозабон тўпни Салоҳга совға қилди ва мисрлик ҳужумчи ҳисобни 2:0 кўринишига етказди. Бу гол африкалик футболчига «Ливерпул»нинг ЕЧЛ ўйинларидаги энг яхши тўпурарига айлантирди.

Courtois just did a Donnarumma 😩😭 pic.twitter.com/URIbEepRz7

— Judie Makki (@judiemakki) February 21, 2023

Дарвозабонлар хатоси

Бундай вазиятда ҳеч ким ўйин мезбонларнинг йирик ҳисобдаги мағлубияти билан якунлашини тасаввур қилмаётганди. Барчаси мантиқий эди: сафар ўйини олдидан «Реал» таркибида йўқотишлар бор эди, «Ливерпул» эса аста-секин формасини тиклаётган ва ўтган турда кучли рақиб «Ньюкасл»ни сафарда мағлубиятга учратганди. Мадридликларга қарши ўйинда Клопп кучли прессингга асосланган одатий схемасига қайтди. Барчаси қизиллар олдинги ҳолатига қайтаётганини кўрсатарди.

Аммо «Реал» ҳеч қачон иложсиз ҳолатга тушмайди ва охиригача курашади. Ўйиннинг 21-дақиқасидаёқ Винисиус йўқ жойдан гол олиб келди: бунгача мадридликлар тўпга эгалик қилаётган бўлса ҳам,  Алиссон дарвозасига яқинлаша олмаётганди. Ва бу гол ҳам ўйинда бурилиш ясайдиган эмасди — бразилияликнинг голи тасодифан урилгандек эди, чунки дарҳол Салоҳ ва Нуньесда қулай вазиятлар бўлди.

Кейин эса аномал ҳодиса рўй берди. Чемпионлар лигаси плей-офф ўйинида Куртуа тўпни совға қилгандек ҳолатлар жуда кам бўлади. Лекин бундай ўйинда икки топ-дарвозабон шундай хатога йўл қўйиши ҳаётда бир марта содир бўлган воқеадир. Сешанба оқшомида мухлислар айнан шу ҳодисага гувоҳ бўлишди: Алиссон Винисиусга гол совға қилди ва таблода бир хил рақамлар порлай бошлади.

First Courtois now Alisson tf is happening 😭 pic.twitter.com/V68nmiqvDQ

— Rick (@RickFCB_) February 21, 2023

Бенземанинг дубли

Шундан кейин «Ливерпул» учун даҳшатли ҳолат юзага келди. «ПСЖ», «Челси» ва «Манчестер Сити» ўтган мавсумда мадридликлар «ёниб» кетгандан кейин ҳам тиклана олиши мумкинлигига гувоҳ бўлганди. Энди эса Клопп жамоаси бу жамоа қандай жонланишини томоша қилишга мажбур бўлди.

Танаффус арафасида Родриго «Реал»ни ҳисобда олдинга олиб чиқишга яқин эди, аммо Робертсон тўпни унинг оёқлари остидан олиб қўйди. Лекин бу мезбонлар учун ҳалокатни бироз кечиктирди, холос. Иккинчи бўлим бошланганидан бир неча дақиқа ўтиб Эдер Милитао Қироллик клубини олдинга бошлади. Кўп ўтмай «Олтин тўп» соҳиби Чемпионлар лигасининг жорий мавсумидаги илк голини нишонлади - тўп шу кеча антиқаҳрамонларидан бўлган Гомеснинг оёқлари орқали дарвозага бориб тушди (Винисиус биринчи голни ураётганида унинг рўпарасида у турганди, иккинчи гол урилганда эса олдида ҳужумчи турган Алиссонга тўпни у узатганди, Милитаонинг голи урилган жарима зарбаси унинг фолидан кейин белгиланганди). 

«Ливерпул» бу вақтга келиб нокдаун ҳолатида эди, жамоа шунда ҳам олдинга юришга ҳаракат қилди ва пенальти ишлаши мумкин эди, аммо футболчилар ҳакамни ишонтира олишмади. «Реал»га эса ҳеч қандай 11 метрлик зарбанинг ҳожати бўлмади — Бензема ўйин эндшпилидан анча олдинроқ ҳисобни йирик кўринишга келтирди - унинг иккинчи голи урилишида офсайд бордек кўринганди, аммо Гомес орқароқда қолиб кетгани маълум бўлди.

Клопп футболчиларни алмаштириш орқали ҳужумда яна нимагадир эришмоқчи бўлди, аммо ўзгаришлар ёрдам бермади. «Ливерпул» фантастик сценарийда мағлубиятга учради ва ўтган йилги финалдаги мағлубият учун реванш олиш армон бўлиб қоладиган бўлди - жавоб ўйинида Мадридда йирик ҳисоб фантастик сценарийларга ҳам хос эмас.

FT: Liverpool 2-5 Real Madrid

Vinicius 2 gol
Benzema 2 gol pic.twitter.com/yq5bJpO0TY

— Talk Footballs (@talkfootballsid) February 21, 2023

Хвича пенальтидан гол уролмади, аммо доҳиёна паси билан «Наполи» учун ЕЧЛ чоракфиналини деярли кафолатлади.

Айнтрахт — Наполи 0:2
Голлар: Осимҳен (40), Ди Лоренцо (65). 
Аниқ ижро этилмаган пенальти: Кварацхелия (36).
Айнтрахт – Трапп, Бута (Кнауфф, 69), Якич, Ндика, Тута, Макс (Ленц, 90+2), Гётце (Алиду, 81), Соу, Камада, Линдстрем (Борре, 69), Коло-Муани.
Наполи – Мерет, Ди Лоренцо, Рраҳмани, Ким Мин Жэ, Оливера, Лоботка, Зелиньски, Замбо-Ангисса (Ндомбеле, 80), Лосано (Элмаз, 80), Осимҳен (Симеоне, 84), Кварацхелия (Политано, 84).
Огоҳлантиришлар: Ким Мин Жэ (38), Гётце (60), Элмаз (83).
Четлатиш: Коло-Муани (58).

«Ливерпул» ва «Реал»нинг навбатдаги эпик қарама-қаршилиги фонида Франкфуртдаги ўйин афишаси камтарроқ кўриниши табиий эди. Бошқа томондан барча Чемпионлар лигаси сараланган клублар учун турнир бўлиб қолганидан шикоят қилади. Бу ўйин эса доим ҳам плей-оффда ўйнамайдиган янги номлар тўқнашуви эди. Шу билан бирга бу жамоаларнинг бири айни вақтда А серияда катта фарқ билан етакчилик қилмоқда. Иккинчиси — ўтган мавсумда «Барселона»ни йўлдан олиб, Европа Лигасининг ғолиби бўлган.

Жамоалар таркибида ёрқин шахслар ҳам етарлича. Бу ўйинни Европанинг «кучли бешлиги»га кирувчи лигаларидаги энг ёрқин дебютантлар қарама-қаршилиги деб аташ ҳам мумкин эди. Франциялик Коло Муани ярим йил олдин ҳам шунчаки истиқболли футболчи саналарди ва ўртамиёна «Нант»дан эркин агент сифатида «бургутлар» сафига ўтганди. Бугунги кунга келиб эса ЖЧ-2022 финалчиси, уни финал ўйинида Эмилиано Мартинес дарвозасига ҳал қилувчи голни ура олмаган, лекин ўша ўйинни кучли ўтказган футболчи сифатида кўпчилик яхши таниб қолган.

Қолаверса, у бундеслигадаги илк мавсумидаёқ рекордлар китобини қайта ёзмоқда, у ҳозирнинг ўзидаёқ голлар бўйича ҳам, голли узатмалар бўйича ҳам иккита рақамда ифодаланувчи кўрсаткичлар қайд этган (10+10). «Айнтрахт»да сўнгги йилларда Аллер, Йович ва Андре Силва каби тўпурар футболчилар бўлган, аммо бундай универсал футболчи бўлмаган. Худди «Наполи»даги каби. Италия жамоасида ҳам Кварацхелия голлар ҳам уради, голли узатмалар ҳам беради, қўшимчасига эффектив финтлари билан жўшқин ва талабчан неаполликларни ўзига мафтун этади.

Албатта, Марадона билан параллеллар ўтказиш мублолаға бўларди, лекин буюк аргентиналик давридан буён скудетто ва еврокубоклардаги ғалабаларни кўрмаган жанубликлар жамоасини шу футболчи яна катта ғалабаларга етакламоқда. Агар дон Диего тирик бўлганида, ўзининг рекордларини янгилаётган Хвича учун хурсанд бўлган бўларди. Ва грузин вингери билан таъсирчан суҳбатлар ўтказган бўларди — ўз вақтида ҳужумнинг чап қанотида ўйнаган Инсинье билан бўлгани каби.

Майдондаги ўйин ҳам анча қизиқарли кечди. Жамоалар юқори темп, прессинг ва қарши прессинг, интенсивлик таклиф этишди, бу ҳақда «Айнтрахт» бош мураббийи Оливер Гласнер ҳам ўйиндан олдин айтиб ўтганди. У немисларда интенсивлик борасида устунлик бўлмаслиги ҳақида гапириб, очиқчасига камтарлик ҳам қилганди. Аммо бундай баёнотлар — стратегия элементи ҳисобланади, Лучано Спаллетти ҳам ўз жамоаси имкониятларини баҳолашда камтарлик билан гапирди. У немислар плей-офф ўйинларида кўпроқ тажрибага эгалигига эътибор қаратди, еврокубокларда рақиб савияси юқори бўлгани туфайли доимий равишда майдоннинг иккинчи томонида ўйнаш имконсизлигини айтди.

Жамоага бу ўйинда тўлиқ устунлик керак эмасди. «Наполи» Франкфуртда биринчи бўлимда барчасини ақл билан бажарди. Шу билан бирга, жамоага омад ҳам ёрдамга келди, Коло Муанининг зарбаси бироз хато кетди. Футболчилар сабр билан мудофааланди. Талаб этилганда эса позицион ҳужумларга ўтилди ва қарши ҳужумларда имкон изланди. Таблода узоқ вақт ноллар қолиши сабаби ўзаро дуэлларда Трапп Кварацхелияни 2:0 ҳисобида енгиши бўлди: аввалига унинг жарима майдони ташқарисидан чўпчиб келган тўпга берган зарбасини дарвоза тўсини остидан қайтарди, кейин эса пенальтини тўсди.

Save of the night? 🧐#UCLsaves || @TurkishAirlines pic.twitter.com/NirrVHWTPX

— UEFA Champions League (@ChampionsLeague) February 21, 2023

Лекин Хвича «Наполи» учун муҳим ва тизим таянчи бўлган футболчи, агар унда ўхшамаса, гол урадиган бошқа ижрочилар бор. Пенальтидан олдинги вазиятда Лосанонинг зарбаси устунга тегиб майдонга қайтганди ва бу тўп учун курашда Осимҳен йиқитилди. Улар бўлим охирида барибир гол уюштиришди, мексикаликнинг идеал пасидан кейин нигериялик тўпурар тўпни дарвозага жойлаб қўйди. Немислар танаффусгача яна бир гол ўтказиб юбориши мумкин эди, тўп майдон марказида йўқотилгач меҳмонлар комбинацияси дарвоза ишғол этилиши билан якунланди, аммо бу вазиятда видеотакрор орқали кичик офсайд қайд этилди.

Мезбонларни иккинчи бўлимда Хвича яна бир бор кечирди. Бу сафар Трапп уни бирга бир вазиятда тўхтатиб қолди. Аммо бу локал омадсизлик — Коло Муанининг ортиқча жонбозлиги билан солиштирганда майда кўринади, француз футболчиси рақиб жарима майдони яқинида тўп учун кураш чоғида бутсаси тишлари билан Замбо Ангиссанинг оёқларини босиб олди ва «Айнтрахт» ўйиннинг қолган қисмини бир киши кам бўлиб ўтказишига тўғри келди. Етмаганига унинг ўзи ҳам жароҳат олди.

Шундан кейин барибир Кварацхелиянинг вақти келди ва унинг товони билан берган нозик узатмаси Ди Лоренцо ҳисобдаги устунликни оширишини таъминлади.

Кейинги босқич масаласи икки ўйин натижасига кўра ҳал бўлади, аммо бундай захира билан Неаполда италянлар жамоаси шунчаки ўз даражасида ўйин кўрсатиши кифоя қилади. Айни вақтда «Наполи» бир оёғи билан чоракфиналда.