Кристианни қидириш ишлари 11 кун давом этди.
Бутун дунё қарийб икки ҳафта мобайнида Туркия ва Сурияда 6 феврал куни рўй берган даҳшатли зилзила оқибатларини кузатиб борди. Сўнгги маълумотларга кўра, икки мамлакатда табиий офат қурбонлари сони 46 мингдан ошган ва бу сўнгги рақамлар эмас - жойларда харобаларни тозалаш ишлари давом этмоқда.
Футбол билан боғлиқ марказий сюжетлардан бири Кристиан Атсунинг тарихи бўлди. Ганалик 31 ёшли яримҳимоячи Туркия чемпионатида «Ҳатайспор» клуби аъзоси эди, бу клуб зилзиладан энг кўп талафот кўрган Ҳатай вилоятида жойлашган. У 6 феврал кунидан алоқага чиқмай қўйганди. 18 феврал куни эса қўрқув билан кутилган хабар тасдиқланди — Атсунинг жасади харобалар остидан топилди.
Агенти ва клуби Атсунинг ўлимини тасдиқлади, бунгача у тирик ҳолда чиқариб олингани ҳақида хабарлар тарқалганди
6 феврал куни Fanatik нашри Кристиан Атсу ва «Ҳатайспор» клуби спорт директори Танер Савут йўқолиб қолгани ҳақида хабар берганди. Шу куни кечқурун Португалиядаги A Bola нашри Атсу бино харобалари остида тирик топилгани ҳақида хабар берди, хабарда унинг нафас олиш билан боғлиқ муаммо кузатилаётгани ва оёғи шикастлангани ҳақида тафсилотлар ҳам бор эди. Кейинги кун тонгида эса «Ҳатайспор» раҳбарияти бу янгиликни рад этиб чиқди — клуб фахрий президенти Лутфа Савас қидирув ишлари давом эттирилаётганини маълум қилди.
Шу куни, 7 февралда «Ҳатайспор» менежери Мустафо Ўзат Атсу омон қолганини хабар қилди: «Кристиан Атсу жароҳатлар билан топилди. Бизнинг спорт директоримиз Танер Савут, афсуски, ҳамон харобалар остида қолмоқда. Ҳатай жуда жиддий талафот кўрган. Биз энг хавфли соатлар охирига яқинлашмоқдамиз», — деди у Millyet нашрига. Ва бу маълумот ҳам хато бўлиб чиқди — кейинроқ Ўзат ўзига раддия берди.
«Биз «Ҳатайспор» президенти билан Кристиан Атсу масаласида учрашув ўтказдик. У харобалар остидан қора танли одам чиқариб олганини, аммо бу Атсу экани аниқлигини билмаслигини айтди», — дея изоҳ берди Туркия футбол федерацияси президенти Меҳмет Буюкекши.
Кристианнинг тақдири 18 февралга келиб узил-кесил аниқ бўлди. «Кристиан Атсу топилди. Афсуски, у вафот этган», — дея ёзди ижтимоий тармоқларда футболчининг агенти Мурат Узунмеҳмет. Кейинроқ маълумот «Ҳатайспор» томонидан тасдиқланди, клуб хабарида шундай дейилган: «Ўз ҳамдардлигимизни билдирамиз. Харобалар остида вафот этган футболчимиз Кристиан Атсунинг танаси Ганадаги она шаҳри томон йўлга чиққан. Биз сени унутмаймиз, Атсу. Гўрингда тинч ёт, ажойиб инсон. Қайғумизни ифодалаш учун сўз йўқ».
«Порту», «Челси», «Витесс», «Эвертон», «Ньюкасл» ва Атсу бунга қадар тўп сурган бошқа клубларнинг саҳифаларида ҳам ҳамдардлик постлари қолдирилган.
Атсу жаҳон чемпионатида қатнашган ва Африкада энг яхши футболчи деб топилганди
Кристиан Атсу Ганадаги кўп оилали қашшоқ оилада туғилган. Футбол сирларини Нидерландиянинг «Фейеноорд» клубининг ушбу мамлакатдаги филиал клуби бўлмиш «Ференоорд Феттех»да ўрганган. 17 ёшдалигида тезкор ва техникаси юқори бўлган вингер «Порту» клубига ўтади, 21 ёшида миллий жамоада дебют қилади, 22 ёшида эса «Челси»да пайдо бўлади. Лекин у лондонликлар асосий таркибида бирорта расмий ўйинда майдонга тушмаган, тўрт йил давомида турли клубларга ижарага берилган. Халқаро миқёсда эса унинг ишлари яхшироқ юришган — Атсу Гана миллий жамоаси билан 2014 йилги жаҳон чемпионатига борган, жамоада жами 60 ўйин ўтказган, 2015 йилда эса уни Африка Кубогининг энг яхши футболчиси сифатида тақдирлашган.
2017 йилда Атсу «Ньюкасл»га кўчиб ўтади, аммо бу ерда ҳам асосий таркибда ўрнаша олмайди, икки йил ўтиб Саудия Арабистонининг «Ал-Раёз» клуби аъзосига айланади, 2022 йил сентябрида «Ҳатайспор» билан шартнома имзолаганди.
Янги жамоасидаги дебют голини Кристиан 5 феврал куни, зилзилага бир неча соат қолганида урди. Ва шу ўринда драматик тафсилотлар юзага чиқди, бу ҳақда «Ҳатайспор» маъмурий менежери Фотиҳ Илек айтиб берди. Унинг сўзларига кўра, Атсу уни бошқа жамоага қўйиб юборишни сўраган ва қишки трансферлар ойнасида қатор таклифларга эга бўлган. Унда доимий ўйин амалиёти бўлмаган, шу туфайли мураббий трансферга қаршилик билдирмаган. Аммо 5 феврал куни Атсу «Қосимпоша»га қарши ўйиннинг сўнгги дақиқаларида жарима зарбасидан ғалаба голини урган.
Кристиан Туркияда урилган илк голидан шу қадар хурсанд бўладики, Францияга кечқурунги рейс учун брон қилинган чиптани бекор қилади, у ўша куни оиласи билан учрашмоқчи эди, бунинг ўрнига ўз муваффақиятини жамоадошлари билан нишонлашга қарор қилади. Атсу Туркиядан 6 феврал куни учиб кетишни мўлжаллаганди, аммо маҳаллий вақт билан эрталабки соат 4 дан ўтганда ҳалокатли зилзила рўй беради.
Атсу билан бирга бедарак йўқолган «Ҳатайспорт» клуби спорт директори Хамет Савутдан эса ҳозирга қадар дарак йўқ. Унинг тақдири ҳамон номаълум бўлиб қолмоқда.
