Rossiya «do‘stona» to‘lov tizimlari orqali valutada hisob-kitob qilishni yo‘lga qo‘yishni mo‘ljallamoqda

Iqtisodiyot 17:45 / 17.02.2023 19932

Rossiya moliya vazirligi valuta hisob-kitoblarida «do‘stona» davlatlarning (ular safida O‘zbekiston ham bor) to‘lov tizimlaridan foydalanishga ruxsat berish imkoniyatini ko‘rib chiqmoqda.

«Vedomosti» nashrining yozishicha, Rossiyada tijorat maqsadlarida xorijiy elektron hamyonlardan foydalanish 2021 yildan buyon taqiqlangan. Moliya vazirligi endi rezidentlarga hisobvaraq ochmasdan norezidentlar, yuridik va jismoniy shaxslarga valuta o‘tkazish imkoniyatini taklif etmoqchi.

Vazirlik bu borada hattoki Rossiyaning yirik biznes vakillari o‘rtasida so‘rovnoma ham o‘tkazgan.

Gazeta ma’lumotlariga ko‘ra, taklif Moliya vazirligi moliya siyosati departamenti direktori Ivan Chebeskov tomonidan tarqatilgan. Xatga «do‘stona» davlatlarning xorijiy provayderlariga tegishli elektron to‘lov vositalari orqali hisob-kitobga joriy etilgan taqiq yechilishi to‘g‘risidagi prezident farmoni loyihasi ham qistirilgan.

«Rossiya biznesi fikricha, mamlakatning amaldagi valuta qonunchiligi rezidentlarni norezidentlar bilan noteng sharoitga solib qo‘ymoqda», deyiladi taklifga berilgan tushuntirish xatida.

«Vedomosti»ga ko‘ra, moliya vazirligi taklifiga biznesmenlar 6 fevralga qadar javob berishi kerak bo‘lgan. Vazirlik vakili boshqa izoh berishdan bosh tortdi.

Rossiya rezidentlariga 2021 yil 1 iyulidan boshlab tijoriy maqsadlarda xorijiy (Alipay, WebMoney, PayPal va boshqa) elektron hamyonlardan foydalanish taqiqlangan. Masalan, ular orqali norezidentlar bilan hisob-kitob, Rossiyada tovarlar va xizmatlar uchun to‘lov qilish mumkin emas. Rossiyalik soliq to‘lovchilar bunday hamyonlar orqali bir yilda 600 ming rubldan ziyod o‘tkazma qilsa, deklaratsiya topshirishi shart.

Endi moliya vazirligi taklifiga ko‘ra, rezidentlarga agar xizmat ko‘rsatuvchi YeOII hamda Rossiyaga «do‘stona» munosabatdagi davlatlardan birida ro‘yxatdan o‘tgan bo‘lsa, hisobvaraq ochib o‘tirmasdan norezidentlar, yuridik va jismoniy shaxslarga xorijiy valutani o‘tkazishga ruxsat beriladi. «Do‘stona» davlatlar ro‘yxatiga 50 ga yaqin davlatlar, jumladan Turkiya (ularning Troy to‘lov tizimi bor), Armaniston (ArCa), Qirg‘iziston («Elkart») va Belarus («Belkart») kabi davlatlar nazarda tutilmoqda.

Prezident Putin farmoni loyihasiga ko‘ra, rezidentlarga tashqi savdo shartnomalari bo‘yicha Rossiyadan olib chiqilayotgan tovarlar va xizmatlar uchun norezidentlarga to‘lov qilishga ruxsat beriladi.

Nazarda tutilishicha, farmonning kuchi 2022 yilning 8 avgustidan so‘ng paydo bo‘lgan huquqiy munosabatlarga tegishli bo‘ladi. O‘sha kuni Vladimir Putin valuta mablag‘lari xorijiy banklarda muzlatilgan Rossiya banklari majburiyatlarni faqat rublda bajarish yoki umuman bajarmasligiga ruxsat bergan edi.

5 million ishchi o‘rin yaratgan 450 ming tadbirkorni birlashtiruvchi «Opora Rossii» kichik va o‘rta biznes Umumrossiya jamoatchilik tashkiloti prezidenti Aleksandr Kalinin Rossiya moliya vazirligining bu tashabbusini kichik va o‘rta biznes uchun yaxshi yangilik deb atagan.

«Bu tadbirkorlarga buyurtmachilar va yetkazib beruvchilarga transchegaraviy hisob-kitoblar va to‘lovlarni yaxshiroq va osonroq amalga oshirish imkoniyatini beradi», — degan u.

Taqiq olib tashlanishi onlayn savdo sohasida ham asoslanmagan to‘siqlarni bartaraf etadi, degan AB «A-PRO» sanksiya amaliyoti rahbari Yekaterina Makeyeva. Wildberries, Ozon va «Yandeks Market» kabi Rossiya marketpleyslari pandemiya davridan buyon logistikani rivojlantirib, savdo maydonchasida yaqin xorijdan tadbirkorlarning ishtirokini ham o‘stirib borishayotgan edi. 

Ko‘proq yangiliklar: