Iqtisodiyot vaziri Abdulla bin Tuk al-Marri bilan o‘tkazilgan muloqot chog‘ida ikki tomonlama savdo-iqtisodiy va sarmoyaviy hamkorlikni kengaytirishning dolzarb masalalari, qo‘shma loyihalarni amalga oshirish jarayoni muhokama qilindi.

BAA yangi xususiy kompaniyalarining O‘zbekiston bozoriga kirishga qiziqayotganligi qayd etildi. Shu nuqtayi nazardan, kimyo, kon-metallurgiya va to‘qimachilik sanoati eng istiqbolli yo‘nalishlar sifatida tilga olindi.

Sayyohlik, kimyo, qishloq xo‘jaligi, qurilish va boshqa sohalardagi kompaniyalarning davlat ulushini sotib olishni nazarda tutgan holda BAA kompaniyalarining O‘zbekistonda amalga oshirilayotgan xususiylashtirish jarayonlarida ishtirok etishi imkoniyatlari ko‘rib chiqildi.

Joriy yilning may oyida Samarqand shahrida Savdo-iqtisodiy va ilmiy-texnikaviy hamkorlik bo‘yicha O‘zbekiston-BAA Hukumatlararo komissiyasining 5-yig‘ilishini hamda qo‘shma biznes-forumni tashkil etish masalasi kelishib olindi.

Energetika va infratuzilma vaziri Suhayl Muhammad al-Mazrui bilan uchrashuv chog‘ida O‘zbekiston energetika sohasi va infratuzilmasini rivojlantirish yo‘nalishlarida ikki tomonlama investitsiya hamkorligini kengaytirishning dolzarb masalalari muhokama qilindi.

BAA tomoni O‘zbekiston bilan BAA o‘rtasidagi hamkorlik samarali va muvaffaqiyatli o‘zaro sheriklikning amaliy namunasi ekanligini alohida ta’kidladi.