Украина президенти Владимир Зеленский Британия парламентида кўп сонли сиёсатчилар олдида нутқ сўзлади ва уларга «жасорати» учун миннатдорчилик билдирди.

«Британия урушнинг биринчи кунидан, дастлабки сониялари ва дақиқаларидан Киевнинг ёнида бўлди... дунё ҳали бунга қандай муносабатда бўлишни тушунмаётганида ёрдам қўлини чўзди», деди у.

Зеленский британияликларга чуқур миннатдорчилик билдирди.

«Душман ўқлари остида жанг қилаётган қаҳрамонларимиз номидан, ҳаво кучларимиз ва Украинани душман самолётларидан ҳимоя қилаётган ҳар бир ҳимоячи номидан, чегараларимизни тиклаш учун курашаётган танкчиларимиз номидан, ҳозирда тайёргарликдан ўтаётган ҳарбий хизматчиларимиз номидан Британияга раҳмат айтаман», деди Зеленский.

Украина раҳбари Британиянинг собиқ бош вазири Борис Жонсонни ҳам алоҳида эслади. У Россия босқинининг бошида «қатъиятлилик ва ирода» кўрсатганини, «қўлдан келган ва келмаган ҳамма нарсани» қилганини айтди.

Зеленскийнинг сўзларига кўра, Украинанинг ғалабаси дунёни ўзгартиради ва бўлажак тажовузкорларни тияди. У ўтган урушларда «ёвузлик ютқазганини» ва «эркинлик ғалаба қозонишини» билишини оптимистик оҳангда таъкидлади.

«Британия ҳаётимиздаги энг муҳим ғалаба сари биз билан бирга қадам ташламоқда, бу уруш ғояси устидан ғалаба қозониш бўлади. Эркинлик ғалаба қозонишини, Россия эса мағлуб бўлишини биламиз», деди у.

Украина президенти жаҳон ҳамжамиятини жанговар самолётларни беришга чақирар экан, паламентга украиналик учувчи дубулғасини ҳам совға қилди.

«Мен тушунтиришим керак - бу ҳақиқий учувчининг дубулғаси, у бизнинг энг муваффақиятли учувчимиз. Унда «Бизда эркинлик бор - илтимос, уни ҳимоя қилиш учун бизга қанотларни беринг... Бизга жанговар самолётлар керак, чунки самолётлар эркинлик учун қанотдир» деган сўзлар ёзилган», деди Зеленский.

У ўз нутқини қарсаклар остида якунлаб: «Парвардигор Буюк Британияни ёрлақасин, қиролнинг умри узоқ бўлсин, Украинага шон-шарафлар» деди.

8 феврал куни Украина президенти Владимир Зеленскийнинг Буюк Британияга эълон қилинмаган ташрифи ҳақида маълум бўлди. У бош вазир Риши Сунак билан ҳам учрашди. Британия парламентидаги нутқидан кейин Зеленский Букингем саройида қирол Чарлз III билан учрашди.

Буюк Британия ташрифидан кейин Владимир Зеленский Парижда француз ҳамкасби Эммануэл Макрон билан учрашиши режалаштирилган.