Россиялик бизнесмен Роман Абрамовичга тегишли бўлган «Челси» футбол клубини сотишдан тушган 2,3 миллиард фунт стерлинг (тахминан 2,8 миллиард доллар) Украинадаги уруш қурбонларини қўллаб-қувватлаш жамғармасига йўналтирилади. 

Буюк Британия ҳукумати номи ошкор этилмаган фондга маблағ ўтказишга яқин турибди, бироқ бунга қадар у Европа Иттифоқининг розилигини олиши керак, деб ёзди The Telegraph. 

Аниқлик киритилишича, маблағлар 8 ой давомида Абрамовичнинг блокланган банк ҳисоб рақамида сақланди ва бир неча ҳафта ичида жамғармага ўтказиб берилиши мумкин. 

«Ҳукуматдаги манбаларнинг айтишича, янги жамғарма Хайрия комиссиясидан рухсат олиш арафасида. Бироқ, улар ҳам Европа Иттифоқидан «яшил чироқ» олиши кераклиги аниқ, чунки Абрамович у ерда ҳам санкциялар остида», дейилади хабарда. 

Роман Абрамович ва Буюк Британия ҳукумати ўртасидаги келишувга кўра, жамғармага UNICEF UK собиқ ижрочи директори Майк Пенроуз раҳбарлик қилади. 2022 йил давомида у Украинада бўлиб, жамғарма фаолияти учун қонунчилик базасини яратишда иштирок этган. 

Роман Абрамович «Челси»ни сотишдан тушган маблағни Украинадаги уруш жабрдийдаларига ёрдам жамғармасига йўналтириши ҳақида 2022 йилнинг март ойи бошидан маълум бўлган эди. Май ойида Англия Премер-лигаси «Челси»ни америкалик тадбиркор Тодд Боулига сотишни маъқуллаган эди.