Sobiq davlat rahbari Donald Tramp 2024 yil 5 noyabrda AQSh prezidentligiga saylovlar uchun saylovoldi kampaniyasini Nyu-Xempshir va Janubiy Karolina shtatlarida nutq so‘zlash bilan boshladi - bu shtatlarda, odatda, birlamchi saylovlar ancha erta o‘tkaziladi. CBS News telekanalining 28 yanvar, shanba kuni xabar berishicha, Tramp asosan Jo Bayden ma’muriyatining Ukrainadagi urush, AQSh qo‘shinlarining Afg‘onistondan olib chiqilishi va AQSh-Meksika chegarasidagi immigratsiya kabi tashqi siyosat qarorlarini tanqid qilishga e’tibor qaratgan.
«Endi men ko‘proq g‘azablanaman, endi men kampaniyaga har qachongidan ham ko‘proq sodiqman», dedi Tramp Respublikachilar partiyasining Salemdagi (Nyu-Xempshir) yig‘ilishi ishtirokchilariga, shundan so‘ng u Kolumbiyaga (Janubiy Karolina) yo‘l oldi.
Reuters ta’kidlaganidek, ikkala mitingning ohangi ancha past edi. Shunday qilib, Kolumbiyada sobiq prezident shtat Kapitoliysi binosida atigi 200 ga yaqin tarafdorlari bilan suhbatlashdi, siyosatchiga Janubiy Karolina gubernatori Genri Makmaster va senator Lindsi Grem hamrohlik qildi. Shu bilan birga, shtat vakili bo‘lgan besh nafar respublikachi, shuningdek, prezidentlikka potensial nomzod sifatida ko‘rilayotgan Janubiy Karolina senatori Tim Skott tadbirda qatnashmadi.
Ko‘plab respublikachilar Oq uy rahbari lavozimiga o‘z nomzodlarini ilgari surishni o‘ylamoqda, deb xabar bermoqda Reuters. Bunga Florida gubernatori Ronald Desantis ham kiradi, ko‘pchilik tahlilchilar uni Tramp uchun eng katta siyosiy tahdid deb bilishadi. Nyu-Xempshir gubernatori Kris Sununu va Janubiy Karolinaning sobiq gubernatori Nikki Xeyli ham nomzodlikni ko‘rib chiqmoqda.
AQShning sobiq prezidenti Donald Tramp 2022 yil 15 noyabrda Floridadagi Mar-a-Lago qarorgohida nutq so‘zlab, 2024 yilgi prezidentlik saylovlarida ishtirok etishini ma’lum qildi. Siyosatchi mamlakatga «buyuklik va shon-shuhrat»ni qaytarish niyatida ekanini aytdi.
Respublikachilar partiyasidan prezidentlikka rasmiy nomzod bo‘lish uchun Tramp praymeriz va kokuslarda g‘alaba qozonishi kerak. Ular 2024 yil fevral oyida boshlanadi va iyungacha davom etadi. Poygada qatnashish haqidagi rasmiy qaror yozda Respublikachilar va Demokratik partiyalarning qurultoylarida qabul qilinadi.
AQShning amaldagi prezidenti Jo Bayden 2022 yil 9 noyabrda qayta saylanish uchun kurash olib borish rejasini e’lon qildi, biroq u yakuniy qarorni faqat 2023 yil boshida qabul qilishini ogohlantirdi.
