Европа Иттифоқи Украинадаги коррупция бўйича терговни олқишлади

Жаҳон 13:35 / 25.01.2023 3969

Европа комиссияси Украинада ўтган ҳафта ҳокимиятда содир бўлган ва бошқа нарсалар қатори журналистик текширувлар сабаб бўлган коррупция можаролари терговини олқишлайди. Можароларнинг айрим иштирокчилари аллақачон гумондор сифатида кўрилмоқда.

«Биз давом этаётган жиноий терговларга изоҳ бермаймиз, бироқ Украина расмийлари бу масалаларга жиддий ёндашаётганини олқишлаймиз», деди Еврокомиссия матбуот котиби Ана Писонеро 24 январь куни Брюсселдаги брифингда. Унинг таъкидлашича, Киевдан коррупцияга қарши кураш институтларини мустаҳкамлаш учун кейинги ҳаракатлар ва чоралар талаб қилинади. Еврокомиссия Украинанинг коррупцияга қарши курашдаги муваффақиятини 2023 йилнинг кузида Европа Иттифоқини кенгайтириш бўйича навбатдаги чора-тадбирлар пакети доирасида баҳолайди, деди Писонеро.

Украина, хусусан, фаол ва самарали терговлар, шунингдек, судлов ва суд ҳукмларининг ишончли натижалари орқали коррупцияга қарши курашни юқори даражада кучайтириши кутилмоқда. «Коррупцияга қарши кураш чора-тадбирлари, албатта, ЕИга кириш жараёнининг асосий жиҳати, шунингдек, Европа Иттифоқининг макромолиявий ёрдамини давом эттириш учун сиёсий шартларнинг бир қисмидир», — деди Европа Комиссияси вакили.

Европа Иттифоқи ўз ҳамкорлари билан кўп йиллар давомида Украинани айнан қонун устуворлигини мустаҳкамлаш ва коррупцияга қарши курашда қўллаб-қувватлаб келди, дея таъкидлайди Брюссел. Европа Иттифоқи маблағлар тегишли жойга етиб боришини таъминлаш учун турли воситалар ва механизмларга эга, дейди Писонеро. «Биз Украина расмийлари билан яқиндан мулоқотдамиз ва улар ҳисобот беришлари керак, токи маблағ қўшганлар ушбу маблағлар ўз мақсадлари бўйича ишлатилишига кафолат олиши лозим», - дея жавоб берди у DW’нинг саволига.

Европа комиссиясига кўра, Украина сўнгги йилларда коррупцияга қарши курашда сезиларли муваффақиятларга эришган. «Европа Иттифоқининг қўллаб-қувватлаши туфайли коррупцияга қарши тузилмалар яратилди. Албатта, ҳозир биз жавобгарлик ва бу тузилмаларга ажратилган ресурсларни кучайтириш ҳақида гапиряпмиз», деб таъкидлади Брюссел. 

Европа комиссияси бир томондан мониторингни давом эттиришга, иккинчи томондан Украинани қўллаб-қувватлашга ваъда бермоқда. «Келинг, контекстни унутмайлик: Украина шафқатсиз босқинчилик уруши ҳолатида турибди, у бу ерда ҳеч биримиз тасаввур қила олмайдиган муаммоларни ҳал қилиши керак. Биз бу мамлакатнинг ЕИга кириш йўлидаги тараққиётини қўллаб-қувватлашга қатъий содиқмиз», - дея Европа комиссияси вакили брифингда хулоса қилди. 

Кўпроқ янгиликлар