Prezidentning “2023 yil uchun davlat budjeti to‘g‘risida"gi qonun ijrosini ta’minlash chora-tadbirlari to‘g‘risida”gi qarori qabul qilindi.
Hujjat bilan quyidagilar tasdiqlandi:
- 2023 yilda ikkinchi darajali budjet mablag‘larini taqsimlovchilarga ajratiladigan budjet mablag‘larining cheklangan miqdorlari;
- 2023 yil uchun O‘zbekiston respublika budjeti, Qoraqalpog‘iston Respublikasi budjeti, viloyatlar va Toshkent shahar mahalliy budjetlari aylanma kassa mablag‘larining yo‘l qo‘yiladigan eng kam miqdorlari;
- 2023 yil uchun O‘zbekiston davlat budjeti daromadlari prognozi;
- foyda solig‘i to‘liqligicha O‘zbekiston respublika budjetiga yo‘naltiriladigan yirik soliq to‘lovchilar ro‘yxati;
- O‘zbekiston davlat budjetining barqarorligini ta’minlash va xarajatlarning samaradorligini oshirish bo‘yicha “Yo‘l xaritasi”.
Qarorga asosan quyidagi soliq turlari bo‘yicha daromadlar prognozining oshirib bajarilgan qismi Qoraqalpog‘iston Respublikasining respublika budjeti, viloyatlarning viloyat budjetlari va Toshkent shahrining shahar budjetida quyidagi miqdorlarda qoldirish nazarda tutilgan:
- jismoniy shaxslardan olinadigan daromad solig‘i to‘liq hajmda;
- foyda solig‘i to‘liq hajmda (yirik soliq to‘lovchilar, O‘zbekistonda doimiy faoliyat olib boruvchi muassasa orqali faoliyat yurituvchi O‘zbekiston norezidentlari tomonidan, norezidentlarning to‘lov manbaida ushlab qolinadigan daromadlaridan to‘lanadigan foyda solig‘i bundan mustasno);
- qo‘shilgan qiymat solig‘i bo‘yicha Qoraqalpog‘iston Respublikasida daromadlar prognozining oshirib bajarilgan qismining 100 foizi, qolgan hududlarda esa 60 foizi (yirik soliq to‘lovchilar tomonidan to‘lanadigan qo‘shilgan qiymat solig‘i bundan mustasno).
2023 yilda ijtimoiy soliq tushumlari bo‘yicha 2022 yilda amal qilgan taqsimlash me’yorlari saqlab qolinadi.
Shu bilan bir qatorda, 2023 yil uchun quyidagi soliq stavkalari:
“Navoiy kon-metallurgiya kombinati” AJ va “Olmaliq kon- metallurgiya kombinati” AJ uchun:
- rentabellik darajasidan kelib chiqqan holda foyda solig‘i;
- yer qa’ridan foydalanganlik uchun solik, oltin bo‘yicha - 10 foiz, palladiy, kumush va mis bo‘yicha - 15 foiz;
- “O‘zbekneftgaz” AJ uchun neft, tabiiy gaz va gaz kondensati bo‘yicha - 15 foiz;
- oltindan yasalgan zargarlik buyumlarini chakana savdoda sotganlik uchun yig‘im – 1 grammiga 1 000 so‘m miqdorida tasdiqlandi.
2023 yil 1 yanvardan 2026 yil 1 yanvarga qadar davlat maktabgacha ta’lim tashkilotlarida bola ta’minoti uchun ota-onalar to‘lovi miqdorlariga nisbatan tumanlarning toifasidan kelib chiqib, quyidagi kamaytiruvchi koeffitsiyentlar belgilandi: 5-toifadagi tumanlarda - 50 foiz; 4-toifadagi tumanlarda - 50 foiz; 3-toifadagi tumanlarda (shahar aholi punktlaridan tashqari) - 30 foiz.
