Amerikaning Virgin Orbit kompaniyasi tomonidan 10 yanvar, seshanbaga o‘tar kechasi uchirilgan LauncherOne raketasi «anomaliya» tufayli Yer orbitasiga chiqa olmadi, deb xabar berdi matbuot xizmati. Bu Virgin Orbit kompaniyasining Buyuk Britaniya hududidan orbitaga birinchi kosmik kema uchirilishi edi.

9 ta sun’iy yo‘ldoshni orbitaga chiqarishi kerak bo‘lgan raketa-tashuvchi Cosmic Girl nomli o‘zgartirilgan Boeing-747 samolyoti bortida bo‘lgan. Samolyot 9 yanvar kuni kechki payt Angliya janubi-g‘arbidagi Nyuki aeroportidan uchgan.

Samolyot havoga ko‘tarilganidan bir yarim soat o‘tgach, Atlantika okeanidan 10,7 km balandlikda bo‘lganida, raketa uchirdi. Biroq Start Me Up deb nomlangan missiyani muvaffaqiyatli bajarishning imkoni bo‘lmadi. Raketa birinchi bosqich dvigatelini ishga tushirdi va past Yer orbitasiga ko‘tarila boshladi, lekin uni yakunlay olmadi.

Shu bilan birga, Boeing-747 Kornuollga eson-omon qo‘ndi. Ma’lum qilinishicha, LauncherOne raketasi orbitaga olib chiqishi kerak bo‘lgan sun’iy yo‘ldoshlardan ham fuqarolik, ham harbiy maqsadlarda foydalanish mumkin.

Britaniyalik milliarder Richard Brensonning Kaliforniyada joylashgan Virgin Orbit kompaniyasi 2021 yildan buyon AQSh hududidan Tinch okeani uzra to‘rtta shunga o‘xshash raketa uchirilishini muvaffaqiyatli amalga oshirdi.

Nyuki aeroporti Buyuk Britaniya rivojlantirmoqchi bo‘lgan yettita kosmoportlardan biridir. 2023 yil davomida Shotlandiyada birinchi vertikal raketa uchirilishi kutilmoqda. Birlashgan qirollik hukumati kelgusi 10 yil ichida Buyuk Britaniyaning kosmik sanoati bozori 3,8 milliard funt sterlingga (4,3 milliard yevro) yetishini kutmoqda.