Surxondaryo viloyati Sariosiyo tumanida uchta mashina ishtirokida sodir bo‘lgan yo‘l-transport hodisasida haydovchilardan biri halok bo‘lgan. Bu haqda viloyat IIB axborot xizmati xabar berdi.

Hodisa 2023 yil 2 yanvar kuni soat 23:20 larda Sariosiyo tumani Shabnam mahallasidan o‘tgan yo‘lda sodir bo‘lgan.

Sariosiyo tumani markazi tomon ketayotgan Nexia o‘zidan oldinda ketayotgan Spark mashinasi bilan to‘qnashgan. Haydovchi boshqaruvni yo‘qotib ariqqa tushib ketgan va ag‘darilgan.

Spark qarama-qarshi yo‘nalishga chiqib ketgan va to‘g‘ridan kelayotgan Lacetti bilan to‘qnashgan.

Oqibatda Nexia mashinasi haydovchisi og‘ir tan jarohatlari olib, shifoxonada vafot etgan.

Dastlabki surishtiruvda Nexia haydovchisi juda katta tezlikda harakatlangani va oraliq masofani saqlamagani aniqlangan.