Жаҳон чемпионати финалини томоша қилган Аҳмад Ас-Салим Қатар амири Аргентина миллий жамоаси сардори Лионел Месси елкасига қора ва олтин рангли тўнни ташлаганида, аксарият футбол мухлисларидан кўра кўпроқ ҳиссиётларга тўлди.

Мессининг жаҳон кубогини кўтарганида кийган тўни 2200 долларлик бишт бўлиб, Қатарда эркаклар уни тўй, битирув кечаси ва бошқа тантанали тадбирларга кийишади. У Аҳмаднинг оилавий компанияси томонидан тикилган.

Ас-Салим Аргентинанинг Франция устидан қозонган ғалабасини Доҳадаги Souq Waqif бозорида, оилавий дўкони ёнидаги кафеда томоша қилди. Аввалроқ у жаҳон чемпионати расмийларига иккита – бири кичик ўлчамдаги, иккинчиси каттароқ ўлчамдаги тўнни тикиб берган эди. Кейинроқ билишича, кичиги Мессига, каттаси Франция миллий жамоаси сардори Уго Лиорисга кийдирилди.

«Биз уларни кимга мўлжалланганини билмасдик ва мен ҳайратда қолдим», дейди Аҳмад Қатар амири Шайх Тамим бин Ҳамад Ол Соний Мессига тўн кийдирган вазиятни эслаб. У тўндаги ўз компанияси ёрлиғини таниб қолди ва ҳозир жаҳон чемпионатидаги ўзининг ғалабасини нишонламоқда.

Қатар қироллик оиласига узоқ вақтдан бери бишт етказиб берувчи Al-Salem одатда кунига саккиз-ўн дона тўн сотар эди. Душанба куни, финалдан кейин сотувлар 150 тага кўтарилди, шу жумладан Месси томонидан машҳур қилинган энг яхши биштнинг учтаси сотилди.

Аҳмад сўзларига кўра, харидорларнинг деярли барчаси аргентиналиклар эди. У билан суҳбат чоғида дўконга яна кўплаб мухлислар кириб келди. 

«Буни кўрганимизда ҳаммамиз хурсанд бўлдик, бу бир қиролнинг бошқа қиролга совғаси эди», деди аргентиналик мухлислардан бири Маурисио Гарсия. У ҳам қимматбаҳо биштни кийиб кўрди, бироқ нархи жуда юқори экани сабабли сотиб олмади.

Айрим шарҳловчилар, асосан, европаликлар кубок тақдимоти пайтида Мессининг футболкаси бишт билан ёпилганини танқид қилишди. Аммо бу лаҳза араб ижтимоий тармоқларида мамнуният билан кутиб олинди.

«Шайх кимга бишт кийдирса, бу ўша одамни ҳурмат қилиши ва қадрлаши белгисидир», деди Аҳмад.

Унинг айтишича, жаҳон чемпионати расмийлари дўконига келганида, «энг енгил ва шаффоф матоли бишт» сўрашган. 

«Мен ҳайратда қолдим, чунки ҳозир қиш бўлса. Кейинчалик улар Аргентина либоси ёпилиб қолмаслиги учун шундай қилишганини тушундим», дейди у.

Al-Salem Қатардаги бишт тикувчиларнинг энг каттаси бўлиб, унда 60 нафарга яқин тикувчи ишлайди. Ҳар бир биштни тикиш учун бир ҳафта вақт кетади ва етти босқичдан ўтади. Тўн учун олтинранг ип Германиядан, матоси эса Япониядан келтирилади.