O‘zbekiston bosh vaziri Abdulla Aripov va Rossiya hukumati raisi Mixail Mishustin raisligida o‘tgan yig‘ilishda mamlakatlar o‘rtasidagi strategik sheriklik va o‘zaro hamkorlik munosabatlari bugungi holati va istiqbollari muhokama etildi.

Joriy yil 15 sentabrida prezidentlar Shavkat Mirziyoyev va Vladimir Putin tomonidan O‘zbekiston bilan Rossiya o‘rtasida keng qamrovli strategik sheriklik to‘g‘risidagi deklaratsiya imzolangani ta’kidlandi. Hukumatlar oldiga turli sohalarda amaliy hamkorlikni har tomonlama rivojlantirish vazifasi qo‘yilgan.

Majlisda istiqbolli sarmoyaviy loyihalar va savdo shartnomalari amalga oshirilishini ta’minlash hamda madaniy-gumanitar hamkorlikni chuqurlashtirish rejalarini kelishib olindi.

Tomonlar transport va tranzit sohasidagi hamkorlikni kengaytirishdan manfaatdorligi bildirildi. Hududlar orqali tranzit yuk tashishda ishonchli transport-logistika zanjirlarini shakllantirish bo‘yicha hamkorlikni davom ettirish zarurligi ta’kidlandi.

Majlis yakuniga ko‘ra, o‘zaro hamkorlikni yanada rivojlantirishga qaratilgan o‘ndan ortiq hujjat imzolandi.