Канада 1,5 миллион муҳожирни мамлакатга таклиф қилмоқчи

Жаҳон 18:32 / 24.11.2022 6634

Канада федерал ҳукумати улкан режалар ҳақида эълон қилди: 2023 йил январдан бошлаб 2025 йил охиригача мамлакат ҳукумати ҳар йили 500 минг муҳожирни қабул қилишни режалаштирмоқда. Яъни, яқин уч йил ичида Канада аҳолиси жами 1,5 миллион кишига кўпайиши керак.

Аҳоли жон бошига ҳисобланганда, бу Буюк Британия томонидан қабул қилиш режалаштирилаётган муҳожирлардан қарийб саккиз баравар ва АҚШ маъмуриятиникидан тўрт баробар кўпдир.

Шу билан бирга, яқинда ўтказилган ижтимоий сўров шуни кўрсатдики, Канада расмийларининг режалари мамлакат аҳолисининг кайфиятини тўлиқ акс эттирмайди, уларнинг аксарияти чет элликларнинг бундай оммавий оқимидан қўрқади.

Ўнлаб йиллар давомида Канада ўз аҳолиси ва иқтисодиёти ўсишини сақлаб қолиш учун янги резидентлар оқимини атайлаб рағбатлантириб келмоқда. Шу билан бирга, муҳожирларга Канадада доимий яшаш ҳуқуқи берилади, аммо фуқаролик эмас.

Ўтган йили 405 минг киши Канадада яшаш учун рухсатнома олди – бу мамлакат тарихидаги энг юқори кўрсаткич.

Сабаблар оддий арифметика билан изоҳланади. Кўплаб ривожланган мамлакатларда бўлгани каби, Канадада ҳам туғилиш даражаси доимий равишда пасайиб бормоқда, аҳолининг ўртача ёши эса аксинча, доимий равишда ўсиб бормоқда. Бу Канадани нафақахўрлар мамлакатига айлантириш билан таҳдид қилади. Бу эса меҳнатга лаёқатли ёшдагиларни қийнаб қўйиши мумкин.

Канада нафақат муҳожирларни, балки қочқинларни ҳам қабул қилувчи мамлакатдир. 2021 йилда ҳукумат 20 мингдан ортиқ қочқинларга бошпана берган. 2023 йилда бу кўрсаткич 76 мингга етказилиши режалаштирилган.

Кўпроқ янгиликлар