Франция чемпионлик ҳимоясига киришади. Бензема йўқ, барча умид Мбаппедан

Спорт 20:09 / 22.11.2022 10886

Миллатлар лигасидаги тажрибалар

Тарихда амалдаги жаҳон чемпиони ўз титулини сақлаб қолиши фақат икки бор кузатилган. Италия — ўтган асрнинг 30-йилларида ва буюк Бразилия — 1958 ва 1962 йилларда. Бундан ташқари, амалдаги чемпионлар сифатида Аргентина 1990 йилда, Бразилия 1998 йилда финалга қадар етиб келган.

Бу статистикадан келиб чиққан ҳолда, Франциянинг янги триумфи содир бўлишига ишониш қийин. Қатардаги турнирдан кейин ўрнини Зинедин Зиданга бўшатиб бериши айтилаётган Дидье Дешамнинг ўзи ҳам яна бир бор бу ҳақда эслатиб ўтди: «Энг юқори савиядаги турнирда ғолиб чиқиш қийин, титулни сақлаб қолиш эса бундан ҳам қийинроқ».

Ва бу дипломатларга хос бўлган навбатчи иборалар эмас, балки объектив реалликни акс эттирадиган гапдир, жамоанинг ишлари унчалик жойида эмас. Ҳолбуки учранглилар таркиби эълон қилинганида барча Франциянинг кучли ҳужум чизиғига эътибор қаратганди. Аниқроғи — ҳужум чизиғи вакилларидан иккита тенг кучли учлик ташкил этиш мумкинлигига.

Мбаппе, Жиру, Гризманн, Коман, Дембеле — булар мураббийлар учун ёқимли бош оғриғидир. Аммо бу рўйхатда яна икки фамилия бўлиши керак эди. Жамоа машғулотларида Нкунку жароҳат олиб сафдан чиқишидан кейин бир амаллаб унинг йўқлигини билинтирмаслик мумкин эди, аммо Бенземанинг янги жароҳати — чинакамига спорт фожиаси бўлди. Миллий жамоадан бир неча йилга четлатилгани туфайли чемпионлик турнирида бўлмаган ва сўнгги йилларда иккинчи ёшлигини бошдан кечириб, «Олтин тўп» соҳиби бўлган футболчи энди жаҳон чемпиони бўла олмаслиги аниқ.

Карим Бензема. Фото Reuters

Шундай экан, мухлислардаги хурсандчилик ваҳимали хавотирга алмашди. Бунгача ҳам бош мураббий ўрта чизиқдаги муаммоларни қандай ёпиш ҳақида бош қотираётганди. Чунки энди 2018 йилги жаҳон чемпионатидаги асосий фигуралар йўқ — икки киши учун ўйнай оладиган Канте, универсал Матюиди ва доим терма жамоа сафида ўзининг энг яхши ўйинларини намойиш этадиган Погба.

Шу билан бирга, бу кутилмаган муаммолар эмасди, майдон маркази янгиланиши олдиндан маълум эди ва Дешам Миллатлар лигасида уч марказий ҳимоячидан иборат схемадан фойдаланган ҳолда фаол тажрибалар ўтказди. Афтидан, бу вариант таянч зонасидаги камчиликларни ниқоблаш вариантларидан бири сифатида синовдан ўтказилган. Фақат буни муваффақиятли дейиш қийин, шунинг учун, жаҳон чемпионати учун таркиб эълон қилинганида, Дешам аниқ қилиб айтди: терма жамоа ҳимоячилар квартетига қайтади.

Барча умид Мбаппеданми?

Умуман олганда, бу мантиқий қарор эди, чунки Варан ва Кунде жароҳатдан соғайиб сафга қайтишди. Майдон маркази учун қандай ечим бўлиши — сўроқ остида. Йил давомида ўйнаб келинган 4-3-3 варианти асосийси, бунда майдон марказида футболчилар сони кўпроқ бўлади. Аммо айрим экспертлар Дешам Россияда унга соврин келтирган 4-2-3-1 схемасига қайтишини тахмин қилмоқда.

Бу схемада Гризманн ҳужум учидаги Жирунинг ортига жойлашганди. Мбаппе қанотдан ҳужум уюштирган, чап қанотда эса кўпроқ рақиб ўйинини бузишга эътибор қаратган Матюиди ҳаракатланган, у мудофааланиш вақтида қанотни ёпиши ҳам, вазиятга қараб марказга кўчиши ва ҳавбеклар сонини уч нафарга ошириши ҳам мумкин эди. Аммо ҳозирги жамоада бундай вазифаларни бажара оладиган футболчи борми?

Килиан Мбаппе. Фото AFP

Муайян шартлар билан бундай ролни Гендузийга ёки яхши формага кирган Рабьога топшириш мумкин. Таянч яримҳимоясидаги ишларни эса Тшуамени — Фофана жуфтлиги бажариши мумкин. Улар «Монако»да бирга ўйнашган, бу жуфтлик майдон марказига жавобгар эди ва монегаскликлар ўйин услуби терма жамоаникига ўхшаб кетади.

Дешам ўзи ҳали якуний қарорни қабул қилмаган бўлиши мумкин, у нимани ўйлаётгани Австралияга қарши танланган бошланғич таркиб эълон қилингандагина маълум бўлади. Бу таркиб кўп нарсани белгилаб беради, чунки тизимли ва барқарор Данияга қарши ўйинда тажрибалар учун вақт бўлмайди. Қолаверса, бу рақиблар бир-бирини яхши ўрганган, Миллатлар лигасида ўзаро ўйинларда бир мартадан ғалаба қозонган.

Аммо агар Франция гуруҳ босқичидан муваффақиятли ўтибгина қолмай, футболчиларнинг идеал комбинациясини топа олса, чемпионлар плей-оффда узоққа бориши мумкин. Шунингдек, ўзининг тўртинчи мундиалига келган ва Тьерри Анрининг рекордини такрорлаган Ллорис уялтирмаслиги талаб этилади. Ёши ўтиб бораётган посбон «Тоттенҳэм»да вақти-вақти билан қовун туширмоқда ва мураббий дарвозани қўриқлашни Меньянга топширса, хотиржамроқ бўлади.

Ҳужум юлдузларидан эса барча эҳтимолий хатоларга рақиб дарвозаси олдида жавоб қайтариш талаб этилади. Эндиликда — Бензема йўқлигида — барчанинг эътибори Мбаппега қаратилади. Қолаверса, у яқинда терма жамоада клубдагидан кўра кўпроқ эркинликка эга эканини айтганди. Унинг учун Париждаги Месси ва Неймарнинг соясидан чиқишнинг айни пайти келди.

Франциянинг ЖЧ-2022 учун таркиби

Дарвозабонлар: Юго Льорис («Тоттенҳэм»), Альфонс Ареола («Вест Ҳэм»), Стив Манданда («Ренн»).
Ҳимоячилар: Люка Эрнандес, Дайо Упамекано, Бенжамен Павар (барчаси — «Бавария»), Тео Эрнандес («Милан»), Аксел Дисаси («Монако»), Иброҳим Конате («Ливерпул»), Жюл Кунде («Барселона»), Уильям Салиба («Арсенал»), Рафаэл Варан («Манчестер Юнайтед»).
Яримҳимоячилар: Эдуард Камавинга, Орельен Тчуамени (иккиси — «Реал»), Юссуф Фофана («Монако»), Маттео Гендузий, Жордан Верету (иккиси — «Марсел»), Адриан Рабьо («Ювентус»).
Ҳужумчилар: Кингсли Коман («Бавария»), Усмон Дембеле («Барселона»), Оливье Жиру («Милан»), Антуан Гризманн («Атлетико»), Кильян Мбаппе («ПСЖ»), Маркус Тюрам («Боруссия» Менхенгладбаҳ).

Кўпроқ янгиликлар