Ijtimoiy tarmoqlarda Namangan viloyatining Kosonsoy tumanidagi maktablardan birida o‘quvchilar o‘qituvchini kaltaklashgani aks etgan video tarqaldi.
Xalq ta’limi vazirligi matbuot kotibi holat yuzasidan ma’lumot berib, o‘quvchi va o‘qituvchi o‘rtasida yuzaga kelgan kelishmovchilik sabab o‘qituvchi o‘quvchini sinfdan chiqarib yuborgani, o‘quvchi esa sinfga qaytib kirib, o‘qituvchiga qo‘l ko‘targanini ma’lum qildi.
Videoda boshqa o‘quvchilar tomonlarni ajratgani, lekin ulardan biri sinfxonadan chiqib ketayotgan o‘qituvchiga gultuvak otganini ko‘rish mumkin.
Viloyat xalq ta’limi boshqarmasi axborot xizmatining ma’lum qilishicha, hodisa 19 sentabr kuni Kosonsoy tumani xalq ta’limi bo‘limiga qarashli 29-sonli maktabda, fizika darsida sodir bo‘lgan.
«Fizika fani o‘qituvchisi dars o‘tayotganda o‘quvchi o‘qituvchining dars o‘tishiga xalaqit bergan. Shunda o‘qituvchi o‘quvchini darsdan chiqarib, maktabning ma’naviy-ma’rifiy ishlar bo‘yicha direktor o‘rinbosariga suhbatlashish uchun topshirgan.
Biroz vaqt o‘tgandan so‘ng o‘quvchi sinf xonasiga qaytib kirgan va videoda aks etgani kabi o‘qituvchiga tashlangan. Sinfdagi boshqa o‘quvchilar ularni ajratishga harakat qilgan», deyiladi xabarda.
Holat yuzasidan tuman IIB bo‘limi va tuman xalq ta’limi bo‘limi xodimlari maktabda o‘rganish olib borgan va tegishli tartibda o‘quvchining ota-onasiga nisbatan Ma’muriy javobgarlik to‘g‘risidagi kodeksning 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik) 1-qismi bilan ma’muriy javobgarlikka tortilgan.
Shuningdek, xalq ta’limi bo‘limi va maktab rahbarlariga o‘qituvchi va o‘quvchilar o‘rtasida o‘zaro hurmat va belgilangan tartib qoidalar asosida do‘stona munosabat o‘rnatilishini ta’minlash bo‘yicha tegishli ko‘rsatmalar berilgan.
