Video: Samarqandda IIB avtomobili maktab ko‘chasida xavfli tarzda harakatlandi

Ijtimoiy tarmoqlarda Samarqand viloyati Toyloq tumani Xalq ta’limi bo‘limiga qarashli 3-maktab oldida sodir bo‘lgan video tarqaldi.

Videoda o‘zini maktab direktori deb tanishtirgan shaxs ko‘chaning narigi tarafidan maktabga kelayotgan bolalarni piyodalar yo‘lakchasidan o‘tkazish uchun yo‘lning o‘rtasiga chiqib ikki tomondan harakatlanib kelayotgan mashinalarni to‘xtatgani tasvirlangan.

Direktor bolalarni yo‘ldan o‘tkazib bo‘lgach Nexia-3 mashinasi yo‘l chetida to‘xtaydi va undan ikki nafar IIB xodimi tushib keladi. So‘ng Nexia-3’ni boshqarib kelayotgan xodim direktorga qo‘pollik qiladi.

Videoda ma’lum qilinishicha, holat ertalab soat 7:50 larda bolalar maktabga kelayotgan paytda sodir bo‘lgan. Direktor IIB xodimi boshqaruvida bo‘lgan Nexia-3 sal avvalroq ham maktab oldidan juda katta tezlikda harakatlangani, bolalarni yo‘ldan o‘tkazayotgan paytda ikkinchi marta katta tezlikda harakatlanib kelganini aytgan.

Samarqand viloyati IIB axborot xizmati IIB xodimi va maktab direktori o‘rtasida yuzaga kelgan kelishmovchilik holati viloyat IIB tomonidan o‘rganilib, natijasi jamoatchilikka ma’lum qilinishini bildirdi. Shuningdek, IIB xodimlari tomonidan yo‘l harakati qoidalari buzilgani holati YHXB tomonidan ko‘rib chiqiladi.

• Eslatib o‘tamiz, 2021 yil dekabrda prezidentning «O‘zbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlari to‘g‘risida»gi farmoni qabul qilingandi. Unga ko‘ra, O‘zbekistonda bog‘chalar va maktablar oldidagi ko‘chalarda transport vositalarining harakatlanishi uchun ruxsat etilgan tezlik me’yori keskin kamaytirilishi belgilangandi. Shundan so‘ng bog‘chalar va maktablar oldidagi ko‘chalarda transport vositalarining harakatlanishi uchun ruxsat etilgan tezlik soatiga 50 kilometrdan 30 kilometrgacha tushirilgandi.