ЕИ кенгаши раиси Россияни тарк этишни истаганлар учун чегараларни очишга чақирди

Жаҳон 19:06 / 24.09.2022 8181

Ватанини тарк этишни истаган россияликлар Евроиттифоққа кириш имкониятига эга бўлишлари керак, деди Европа кенгаши раиси Шарл Мишел.

Унинг сўзларига кўра, Европа иттифоқи «Кремл қуроли бўлишни хоҳламайдиганлар учун очиқ бўлиши лозим».

«Европа иттифоқи ўз сиёсий қарашлари сабабли хавф остида қолганларни қабул қилиши керак. Россиядаги одамлар Кремлнинг Украина бўйича аҳмоқона қарорига бўйсунмагани учун хавф остида бўлса, буни эътиборга олишимиз даркор», — деди Мишел.

Аввалроқ Евроиттифоқ Россия билан соддалаштирилган виза режими тўғрисидаги келишувни тўхтатганди. Натижада россияликлар учун Шенген визасини олиш қийинроқ ва қимматроқ бўлди.

Эстония, Латвия, Литва ва Полша 19 сентябрдан бошлаб россияликларнинг Шенген визаси бўйича киришларини бутунлай тақиқлади.

Ўз навбатида, Германия сафарбарлик эълон қилинганидан сўнг Россияни тарк этишни истаганлар учун очиқлигини маълум қилди.

Кўпроқ янгиликлар