Rossiyada «qisman safarbarlik» doirasida armiyaga 1,2 million kishini chaqirish rejalashtirilmoqda. Bu haqda «Meduza» federal vazirlikka yaqin manbasiga tayanib xabar berdi.

Shu bilan birga, nashrning Moskva rahbariyatiga yaqin yana bir manbasi poytaxtda 18 ming nafargacha kishi safarbar qilinishi rejalashtirilganini aytdi.

Manbaning qo‘shimcha qilishicha, Peterburgda 3,2 mingga yaqin kishini armiyaga chaqirish rejalashtirilmoqda. 

Nashr suhbatdoshining so‘zlariga ko‘ra, oblast markazlaridan «minimum miqdorda olish tavsiya etilgan».

«Qishloq rayonlariga borishyapti, u yerda OAV, muxolifat yo‘q va urushni ko‘proq qo‘llab-quvvatlashadi», degan manba.

Rossiya mudofaa vaziri Sergey Shoygu safarbarlik e’lon qilinganidan keyin armiyaga 300 ming nafar zaxiradagilar chaqirilishini aytgandi. 

Safarbarlikka jalb etiladiganlar soni Rossiya prezidenti Vladimir Putinning tegishli farmoni 7-bandida ko‘rsatilgan. Bu band maxfiy.

22 sentabr kuni «Novaya gazeta. Yevropa» prezident ma’muriyatidagi manbasiga tayanib, 7-bandda bir millionga yaqin kishi armiyaga chaqirilishi aytilgani haqida yozdi. Prezident matbuot kotibi Dmitriy Peskov bu xabarni yolg‘on deb atadi. 

Peskov avvalroq 7-bandda safarbarlikka jalb etiladiganlar soni ko‘rsatilganini aytgan, ammo ularning aniq soni to‘g‘risida ma’lumot bermagandi. Kreml vakili Shoyguning so‘zlariga asoslangan: «Aytishim mumkin bo‘lgan yagona narsa shuki, Sergey Kujugetovich Shoygu intervyusida „300 ming kishi” degan. Gap 300 mingga yaqin kishi to‘g‘risida bormoqda».