IIV Kiberxavfsizlik markazining xabar berishicha, Qashqadaryo viloyati Koson tumanida yashovchi G.K. va F.M. IIBga ariza bilan murojaat qilib, bank kartalaridan pullarini yechib olgan shaxsga chora ko‘rishni so‘rashgan.

Arizaga ko‘ra, noma’lum shaxs ularning bank kartasi boshqaruvini qo‘lga kiritib, G.K.ning bank kartasida bo‘lgan 2 854 000 so‘m hamda F.M.ning bank kartasida bo‘lgan 3 977 383 so‘m miqdoridagi pullarini yechib olgan.

Tekshiruvlar natijasida, ushbu jinoyatni jabrlanuvchilarning hamkasbi Koson tumanida yashovchi, 1999 yilda tug‘ilgan qiz sodir etgani aniqlangan.

Surishtiruv davomida, qiz bank kartasi ma’lumotlari va jabrlanuvchilarning telefoniga kelgan sms-kodni olib, pullarni o‘zlashtirgani ma’lum bo‘lgan.

 Qayd etilishicha, qizga nisbatan Jinoyat kodeksining 169-modda 3-qismi bilan jinoyat ishi qo‘zg‘atilib, tergov harakatlari olib borilmoqda.

Avvalroq, Samarqandlik 17 yoshli o‘smir Telegram’da soxta aksiya o‘tkazib, 28 kishining bank kartasidagi pullarni yechib olgandi.