AQSh Federal zaxira tizimi (FZT) 21 sentabr, chorshanba kuni yana bir bor asosiy foiz stavkasini sezilarli darajada 0,75 foiz punktga oshirdi – hozir u 3,0 – 3,25 foiz oralig‘ida.
Shu tariqa, AQSh Markaziy banki yillik hisobda biroz pasayib ketgan inflatsiya o‘sishini ushlab turishga harakat qilmoqda – iyuldagi 8,5 foizdan avgustdagi 8,3 foizgacha, lekin u hali ham yuqori darajada. Shuni inobatga olgan holda, FZT stavkaning yana oshishini istisno etmadi, shu bilan birga, bunday yuqori darajaning o‘zi retsessiya qo‘rquvini kuchaytiradi.
«Biz inflatsiyani yengib o‘tishimiz kerak. Qaniydi, buni qilishning og‘riqsiz yo‘li bo‘lganida. Lekin yo‘q», - deb tanlagan FZT rahbari Jyerom Pauellning so‘zlaridan iqtibos keltirdi AFP axborot agentligi. U tanlangan kurs yuqori foiz stavkalari iqtisodiy o‘sishning sekinlashishiga va AQShda ishsizlikning oshishiga olib kelishi mumkin ekanini tan oldi.
FZT ekspertlarining joriy prognozlariga ko‘ra, 2022 yil oxiriga kelib, Qo‘shma Shtatlarda yalpi ichki mahsulotning minimal o‘sishi 0,2 foizni tashkil etishi kutilmoqda, iyun oyida o‘sish 1,7 foiz, mart oyida esa 2,8 foiz bo‘lishi taxmin qilingan edi. 2023 yilda FZT ekspertlari YaIM o‘sishini 1,2 foizga kutmoqda.
Ayni paytda, bu 2022 yilda asosiy foiz stavkasining beshinchi o‘sishi va ketma-ket uchinchi marta 0,75 foiz punktga ko‘tarilishidir. Avvalroq, may oyida FZT 22 yil ichida stavkani eng kuchli oshirib, uni darhol 50 bazaviy punktga ko‘tardi. Umuman olganda, FZT 1970-1980 yillarda inflatsiyaga qarshi kurashda bunday radikal choralarga murojaat qilgandi, shundan so‘ng sezilarli retsessiya kuzatilgan.
Iyun oyida AQShda inflatsiya yillik hisobda 9,1 foizni tashkil etdi. Bu so‘nggi 40 yildagi eng yuqori ko‘rsatkich bo‘lib, COVID-19 pandemiyasi bilan bog‘liq talab va taklifdagi nomutanosiblikni, energiya narxining oshishi va narxlar katta bosimini aks ettiradi.
AQSh Markaziy banki bayonotida aytilishicha, inflatsiyaga qo‘shimcha o‘sish bosimini, shuningdek, iqtisodiy faoliyatga bosim «Rossiyaning Ukrainaga bostirib kirishi va u bilan bog‘liq voqealar» ham ko‘rsatmoqda.
