O‘zbekiston prezidenti Shavkat Mirziyoyev 19 avgustga o‘tar kechasi umra ibodatini ado qildi.

O‘zbekiston yetakchisi ziyoratni boshlashi oldidan islom ummati uchun eng muqaddas masjid bo‘lmish Masjidul Harom hovlisida katta tashkiliy va xavfsizlik chora-tadbirlari amalga oshirildi. Ka’batulloh qo‘riqchilari xavfsizlik yuqori darajada bo‘lishi uchun Shavkat Mirziyoyevga Ka’baga borguniga qadar jonli yo‘lak tashkil qilib berishdi.

O‘zbekiston yetakchisi avvaliga Ka’ba ichiga kirib to‘rt tomonga qarab namoz o‘qidi, xalqimiz haqiga duo qildi. So‘ng prezident ko‘zida yosh bilan islom ummatining qiblasi bo‘lmish Ka’batullohni tavof qildi.

Umra tartibiga ko‘ra Ka’ba 7 marta aylanib tavof qilinadi. Tavofda to‘rtta aylanish farz, qolgan uchtasi vojibdir. Tavof «Hajarul asvad»ning ro‘parasidan boshlanadi. Ka’bani aylanib tavofni boshlagan joyiga kelganda bir tavof hisoblanadi.

Ka’batullohni tavof qilib bo‘lgach, prezident Maqomi Ibrohim ortida 2 ra’kat namoz o‘qib, sa’y amalini bajarishga kirishdi. Ya’ni, Safo tepaligidan Marva tepaligi tomon ezgu niyat va duolar qilib, 7 martta yurib borib kelindi.

Qutlug‘ ibodat vaqtida prezidentga muftiy Nuriddin domla Xoliqnazarov hamda o‘zbekistonlik ulamo Alijon qori hamrohlik qildi. Alijon qori ibodat bekam-u ko‘st bajarilishi uchun amallarni va ibodat davomida aytiladigan duolarni eslatib turdi.

Oxirida Shavkat Mirziyoyev 7 marta sa’y qilganidan so‘ng, Marva tepaligida 2 ra’kat namoz o‘qidi. O‘zbekiston delegatsiyasi namozdan so‘ng duolar qildi. Shu tariqa umra ibodati ado etildi.