O‘tgan yil noyabr oyida Niderlandiyada pul yuvishda ayblanib qo‘lga olingan Rossiya fuqarosi Denis Dubnikov shu hafta Qo‘shma Shtatlarga ekstraditsiya qilindi. Bu haqda AQSh Adliya vazirligining 17 avgust, chorshanba kuni chop etilgan bayonotida aytiladi.
Vazirlik ma’lumotiga ko‘ra, 29 yoshli Dubnikov chorshanba kuni Oregon shtati Portlend shahridagi sudga olib kelingan. Uning ishi hakamlar hay’ati tomonidan 4 oktyabr kuni ko‘rib chiqilishi belgilangan. Oregon shtati qamoqda saqlash markazi RIA «Novosti» agentligiga rossiyalik ularda ekanligini tasdiqladi. U garov evaziga chiqib ketish imkoniyatidan mahrum etildi, deb yozadi axborot agentligi.
Adliya vazirligi bayonotida ta’kidlanishicha, Amerika rasmiylari Dubnikovni o‘zini Ryuk deb ataydigan kiberjinoyatchilar guruhi manfaatlari yo‘lida pul yuvishda ayblamoqda. Ayblovga ko‘ra, rossiyalik 2019 yil iyul oyida AQShda ham, xorijda ham to‘lov dasturi viruslari yordamida amalga oshirilgan kiberhujumlar natijasida qo‘lga kiritilgan 400 ming dollardan ortiq mablag‘ni yuvgan. Agar Dubnikov aybdor deb topilsa, 20 yilga ozodlikdan mahrum etilishi mumkin.
Rossiyalikning advokati Arkadiy Bux avvalroq o‘tgan yilning noyabr oyi boshida Dubnikovga Meksikaga kirishga ruxsat berilmaganini aytdi. U yerdan Amsterdamga yo‘l oldi va AQSh iltimosiga ko‘ra qo‘lga olindi. Buxning ta’kidlashicha, Dubnikov himoyasi «u pul qayerdan kelganini bilmaganini va Rossiya qonunchiligiga muvofiq holda harakat qilganini» bildiradi.
The Wall Street Journal (WSJ) gazetasining noyabr oyida yozishicha, Ryuk 2020 yilda Amerika sog‘liqni saqlash tizimiga bir qator to‘lov dasturlari yordamida amalga oshirilgan hujumlar ortida turgan bo‘lishi mumkin va bu hujumlar qurbonlaridan millionlab dollar olgan.
Dubnikov ikkita kriptovaluta savdo platformasi - EggChange va Crypto asoschilaridan biri. WSJ ma’lumotlariga ko‘ra, AQSh rasmiylari uni ushbu platformalar orqali pul yuvishda ayblamoqda. Noyabr oyida Bloomberg agentligi EggChange kompaniyasi Moskvada ofislari bo‘lgan va noqonuniy yo‘l bilan olingan kriptovalutani naqd pulga aylantirgan to‘rtta kompaniyadan biri sifatida tilga olingan materialni e’lon qildi.
