Эрдўған уруш бошланганидан буён илк марта Украинага борди

Жаҳон 16:59 / 18.08.2022 19911

Эрдўғанга сафар давомида мамлакат ташқи ишлар вазири Мавлуд Човушўғлу ва мудофаа вазири Хулуси Акар ҳамроҳлик қилмоқда.

Эрдўғаннинг кортежи Лвив кўчаларида кўриниш берган. Айнан шу ерда Эрдўған, Зеленский ва Гутерриш ўртасида учрашув ўтказилади. Учрашувда БМТ бош котиби Украинада вақтинча ўт очиш режимини тўхтатиш ташаббусини билдириши, Анқара эса асирларни алмашишда воситачилик таклиф қилиши кутилмоқда.

Турк нашрлари Эрдўған Лвивдаги учрашувда Украина президенти Володимир Зеленскийга Россия президенти Владимир Путин билан учрашув ташкил этишни таклиф қилиши ҳақида ёзмоқда. CNN Turk нашри маълумотига кўра, август ойи бошидаги ўзаро учрашувда Путин туркиялик ҳамкасбига Зеленский билан учрашишга тайёрлигига ишора қилган. Уруш бошидан буён Зеленский бир неча марта Путинга яккама-якка гаплашиб олишни таклиф қилган, Россия томони эса бундай учрашув учун асос йўқлигини айтиб келади.

Эрдўған, Зеленский ва Гутерриш Запорижжя АЭС атрофидаги кескинлик, украин дони ортилган кемаларнинг Қора денгизда ҳаракатланишини ҳам муҳокама қилиши кутилмоқда.

Аввалроқ Туркиянинг «Baykar» компанияси «Bayraktar» ҳарбий дронларини Украинада ҳам ишлаб чиқариши, завод 2023 йилда фаолият бошлаши мумкинлиги айтилганди. Эрдўғанга Украинага ташрифи давомида Туркия мудофаа вазири ҳамроҳлик қилаётгани ОАВда «Bayraktar» бўйича музокаралар ҳам ўтказилиши ҳақида ёзишга асос бўлган.

Кўпроқ янгиликлар