Joriy yil 17-18 avgust kunlari Toshkentda O‘zbekistonning Shanhay hamkorlik tashkilotiga raisligi doirasida tashkilotga a’zo davlatlar ichki ishlar va jamoat xavfsizligi vazirlari to‘rtinchi yig‘ilishi bo‘lib o‘tishi rejalashtirilgan, deb xabar bermoqda “Dunyo” Markaziy Osiyo xalqaro instituti ma’lumotiga tayangan holda.

Kengashda ShHTga a’zo davlatlar ichki ishlar va jamoat xavfsizligi vazirliklari, kuzatuvchi davlatlar va xalqaro tashkilotlar, jumladan, Interpol, BMT Narkotik va jinoyatlarga qarshi kurashish boshqarmasi, MDHga a’zo davlatlar hududida uyushgan jinoyatchilik va boshqa xavfli jinoyatlarga qarshi kurashishni muvofiqlashtirish byurosi hamda MDH aksilterror markazi delegatsiyalari qatnashadi.

Kengash kun tartibiga ko‘ra, xalqaro va mintaqaviy xavfsizlikni ta’minlash jarayonida hamkorlikni yanada rivojlantirish, giyohvandlik vositalari va psixotrop moddalar noqonuniy aylanmasi, terrorizm, ekstremizm va separatizm hamda transmilliy uyushgan jinoyatchilikka qarshi kurashish va boshqa masalalar muhokama etiladi.

Tadbir jarayonida delegatsiya rahbarlarining xalqaro hamkorlikni takomillashtirishga bag‘ishlangan ikki tomonlama uchrashuvlari ham rejalashtirilgan.