Nuriddin Xoliqnazarov prezidentning Saudiyaga tashrifi oldidan tilak bildirdi

O‘zbekiston 21:23 / 16.08.2022 16481

Davlat rahbari 17-18 avgust kunlari Saudiya Arabistoni podshohi Salmon bin Abdulaziz Ol Saudning taklifiga binoan davlat tashrifi bilan ushbu mamlakatga boradi.

“Albatta, bu juda ham tarixiy tashrif. Sababi 30 yil ichida birinchi marta prezidentimizning Saudiya Arabistoniga [davlat] tashrifi amalga oshmoqda”, – dedi muftiy.

“Tashrif davomida davlatimiz rahbari Saudiya Arabistoni podshosi, u yerdagi mutasaddilar, juda ko‘p tashkilotlar, Islom taraqqiyot banki va boshqa tashkilot rahbarlari bilan uchrashuvlar qiladi. Inshaalloh, mana shu uchrashuvlar orqasidan yurtimizga juda katta iqtisodiy rivojlanishga sabab bo‘ladigan hujjatlar imzolanadi.

Tashrifning bizni quvontirayotgan yana bir jihati – muhtaram prezidentimiz Makkayi Mukarrama va Madinayi Munavvarada ham ziyoratda bo‘lishliklari rejaga kiritilgan. Tabiiyki, bu har bir musulmon, mo‘minning qalbiga xursandchilik keltiradi: yurtning otasi – yurtning rahbari xalqining haqqiga qiladigan har bir duosi mustajob bo‘ladi”, – dedi Nuriddin Xoliqnazarov.

O‘zMI raisi tashrif davomida Shavkat Mirziyoyevga hamrohlik qilishini ta’kidladi.

“Alloh taolo bu tashrifni yurtimiz uchun, kelajagimiz uchun, avlodimiz uchun manfaatli qilsin. Tashrif davomida qilinadigan ziyoratlarni Alloh qabul qilsin. Umra ibodatlarini, duolarini mustajob qilsin. Yurtimizga fayz va barokat bersin”, – deya tilak bildirdi muftiy Nuriddin Xoliqnazarov.

Ko‘proq yangiliklar: