Сенаторлар томонидан “Имом Бухорий” орденини таъсис этиш тўғрисида”ги қонун муҳокама қилинди. 

Орденни таъсис этиш тўғрисидаги қонун билан “Имом Бухорий” ордени низоми ва унинг тавсифи тасдиқланмоқда. “Давлат мукофотлари тўғрисида”ги қонунга тегишли ўзгартиш ва қўшимчалар киритилмоқда.

“Имом Бухорий” ордени икки даражадан иборат бўлади: “Олий даражали Имом Бухорий” ордени ҳамда “Имом Бухорий” ордени. “Олий Даражали Имом Бухорий” ордени “Имом Бухорий” орденидан юқори даражада ҳисобланади.

“Олий даражали Имом Бухорий” ордени билан илм-фан ва маданият, ислом маърифати ривожига улкан ҳисса қўшган буюк аллома ва мутафаккирлар ҳаёти ҳамда илмий меросини ўрганиш ва халқаро майдонда кенг тарғиб қилишда катта ютуқларга эришгани учун:

• хорижий давлатлар ва ҳукуматлар раҳбарлари;
• хорижий мамлакатлар парламентлари вакиллари;
• халқаро ташкилотлар, дипломатик ваколатхоналар, консуллик муассасалари ҳамда уларга тенглаштирилган бошқа ташкилотлар раҳбарлари ва вакиллари, хорижий арбоблар ва олимлар;
• мамлакат атоқли давлат ва жамоат арбоблари, диний-ижтимоий соҳадаги раҳбарлар ва етук уламолар, атоқли олимлар, адиблар, педагоглар ва илмий тадқиқотчилар мукофотланади.
• “Имом Бухорий” ордени билан:
• улуғ алломалар илмий меросини чуқур ўрганиб, ўсиб келаётган ёш авлодни аждодлар меросига ҳурмат, ватанга муҳаббат ва садоқат руҳида тарбиялашдаги хизматлари;
• юксак инсоний ғоялар ва муқаддас қадриятларни ўзида ифода этган тарихий меросни тизимли асосда тадқиқ этиш, улардан диний таълим, маънавий-ахлоқий тарбия ишларида фойдаланиш мақсадида зарур дарслик ва ўқув қўлланмалари, илмий-амалий тавсиялар тайёрлашдаги самарали меҳнати;
• мамлакатдаги диний-ижтимоий жараёнлар ҳамда диний бағрикенгликни таъминлаш масалаларини ўрганишга қаратилган илмий-тадқиқот ишларини қўллаб-қувватлаш, тарғибот ва ташвиқот тадбирларини ўтказишдаги фаолияти;
• «Жаҳолатга қарши маърифат» ғояси асосида ислом динига нисбатан содир этилаётган ғаразли таҳдид ва ҳаракатлар олдини олиш, бундай хатарларга қарши курашиш илмий-маърифий асосларини ишлаб чиқиш ҳамда амалиётда қўллаш борасидаги хизматлари;
• ислом цивилизацияси умуминсоний қадриятларини, халқ маънавияти ва маданияти ривожида тутган ўрни ҳамда аҳамиятини ўрганиб, улар илмий-назарий ва амалий жиҳатларини тадқиқ этишдаги катта хизматлари учун мукофотланади.

“Олий даражали Имом Бухорий” ордени билан мукофотланган шахсларга базавий ҳисоблаш миқдори етмиш баравари миқдоридаги бир марталик пул мукофоти, “Имом Бухорий” ордени билан мукофотланган шахслар эса базавий ҳисоблаш миқдори эллик баравари миқдоридаги бир марталик пул мукофоти берилади.

Сенаторлар ушбу орденни таъсис этиш тўғрисидаги қонунни маъқуллади.