Vladimir Putin Kim Chen Inga yo‘llagan maktubida RF va KXDR ikki tomonlama munosabatlarni «har jihatdan va konstruktiv» kengaytirish bo‘yicha «birgalikda harakat qilishini» yozdi. Rossiya yetakchisining 15 avgust kuni Koreya mustaqilligi kuni munosabati bilan KXDR rahbariga yo‘llagan maktubidan parchalar Shimoliy Koreya davlat axborot agentligi KCNA tomonidan keltirildi.
Putinning so‘zlariga ko‘ra, ikki tomonlama aloqalarning mustahkamlanishi har ikki davlat manfaatlariga javob beradi. Bundan tashqari, Rossiya va Shimoliy Koreya birgalikda Koreya yarimoroli va butun Shimoli-Sharqiy Osiyo mintaqasida «xavfsizlik va barqarorlikni» mustahkamlay oladi, deb yozadi Rossiya prezidenti.
Shuningdek, Kim Chen In Putinga maktub yo‘llab, unda Rossiya va KXDR o‘rtasidagi «strategik va taktik hamkorlik, qo‘llab-quvvatlash va hamjihatlik» yangi bosqichga ko‘tarilganini ta’kidlagan. U «tahdidlarning oldini olish bo‘yicha umumiy harakatlar va dushman harbiy kuchlarning provokatsiyalari» haqida ta’kidladi. KCNA qaysi dushman kuchlar nazarda tutilganiga aniqlik kiritmadi, biroq Shimoliy Koreya rahbari odatda bu atamani AQSh va uning ittifoqchilariga nisbatan ishlatadi, deya xabar beradi Reuters.
Shimoliy Koreya iyul oyida «DXR» va «LXR» mustaqilligini tan oldi, Moskva esa Pxenyanda Donbassni tiklash uchun KXDRdan ishchilar yuborish masalasini ko‘tardi.
BMT va AEXA Shimoliy Koreya hozir 2017 yildan beri ilk yadroviy sinovini o‘tkazishga tayyorlanayotganidan xavotirda. Bundan mamlakat shimolidagi «Pungeri» yerosti sinov poligonida so‘nggi oylarda faollik boshlangani darak bermoqda. Sun’iy yo‘ldoshdan olingan suratlarda tunnellar ta’mirlanayotgani va 2018 yilda AQSh bilan muzokaralar chog‘ida buzib tashlangan inshootlar qayta tiklanayotganini ko‘rish mumkin. 2006-2017 yillarda KXDR «Pungeri» poligonida oltita yadroviy sinov o‘tkazdi.
AQSh prezidenti Jo Bayden may oyida Vashington Shimoliy Koreya tomonidan harbiy texnikaning har qanday yangi sinovlariga tayyor ekanini aytdi. Shu bilan birga, u Kim Chen In bilan shaxsan uchrashish imkoniyatini istisno etmadi.
