Путин Кимга КХДР билан муносабатларни кенгайтириш ҳақида ваъда берди

Жаҳон 08:50 / 15.08.2022 7282

Владимир Путин Ким Чен Инга йўллаган мактубида РФ ва КХДР икки томонлама муносабатларни «ҳар жиҳатдан ва конструктив» кенгайтириш бўйича «биргаликда ҳаракат қилишини» ёзди. Россия етакчисининг 15 август куни Корея мустақиллиги куни муносабати билан КХДР раҳбарига йўллаган мактубидан парчалар Шимолий Корея давлат ахборот агентлиги KCNA томонидан келтирилди.

Путиннинг сўзларига кўра, икки томонлама алоқаларнинг мустаҳкамланиши ҳар икки давлат манфаатларига жавоб беради. Бундан ташқари, Россия ва Шимолий Корея биргаликда Корея яримороли ва бутун Шимоли-Шарқий Осиё минтақасида «хавфсизлик ва барқарорликни» мустаҳкамлай олади, деб ёзади Россия президенти. 

Шунингдек, Ким Чен Ин Путинга мактуб йўллаб, унда Россия ва КХДР ўртасидаги «стратегик ва тактик ҳамкорлик, қўллаб-қувватлаш ва ҳамжиҳатлик» янги босқичга кўтарилганини таъкидлаган. У «таҳдидларнинг олдини олиш бўйича умумий ҳаракатлар ва душман ҳарбий кучларнинг провокациялари» ҳақида таъкидлади. KCNA қайси душман кучлар назарда тутилганига аниқлик киритмади, бироқ Шимолий Корея раҳбари одатда бу атамани АҚШ ва унинг иттифоқчиларига нисбатан ишлатади, дея хабар беради Reuters. 

Шимолий Корея июль ойида «ДХР» ва «ЛХР» мустақиллигини тан олди, Москва эса Пхенянда Донбассни тиклаш учун КХДРдан ишчилар юбориш масаласини кўтарди. 

БМТ ва АЭХА Шимолий Корея ҳозир 2017 йилдан бери илк ядровий синовини ўтказишга тайёрланаётганидан хавотирда. Бундан мамлакат шимолидаги «Пунгери» ерости синов полигонида сўнгги ойларда фаоллик бошлангани дарак бермоқда. Сунъий йўлдошдан олинган суратларда туннеллар таъмирланаётгани ва 2018 йилда АҚШ билан музокаралар чоғида бузиб ташланган иншоотлар қайта тикланаётганини кўриш мумкин. 2006-2017 йилларда КХДР «Пунгери» полигонида олтита ядровий синов ўтказди. 

АҚШ президенти Жо Байден май ойида Вашингтон Шимолий Корея томонидан ҳарбий техниканинг ҳар қандай янги синовларига тайёр эканини айтди. Шу билан бирга, у Ким Чен Ин билан шахсан учрашиш имкониятини истисно этмади. 

Кўпроқ янгиликлар