Жиззахда оддий ҳазил қотиллик билан тугади

Ўзбекистон 15:16 / 15.08.2022 17528

Жиззах вилояти ИИБ ахборот хизматининг хабар беришича, 8 август куни соат 21:30 ларда Зарбдор тумани Тараққиёт маҳалласида яшовчи 38 ёшли ҳамда Фориш тумани “Боғдон” ҚФЙ да яшовчи 31 ёшли фуқаро ўзаро гаплашиб турганда Самарқанд вилояти Булунғур тумани Қангли қишлоғида яшовчи, 1966 йилда туғилган фуқаро уларнинг олдига келган.

Шундан сўнг Зарбдор туманида яшовчи фуқаро булунғурликнинг чўнтагидан ҳазиллашиб, 50 минг сўм пулларини олиб қўйган вақтида жанжал келиб чиққан. Низо давомида булунғурлик шахс сумкасида бўлган ошхона пичоғи билан ҳар икки фуқарога тан жароҳати етказган.

Оқибатда Зарбдор туманида яшовчи фуқаро кўрсатилган тиббий ёрдамга қарамасдан вафот этган. Тан жароҳати олган иккинчи шахс эса Республика шошилинч тез тиббий ёрдам илмий маркази Жиззах филиалининг жонлантириш бўлимига ётқизилган.

Қайд этилишича, ҳодиса юзасидан Жиззах шаҳар прокуратураси томонидан жиноят иши қўзғатилиб, гумонланувчи эҳтиёт чораси сифатида қамоққа олинган.

Аввалроқ, Жиззахда икки чўпоннинг жанжали қотиллик билан якун топганди.

Кўпроқ янгиликлар