ЕИга раислик қилаётган Чехия россияликлар учун шенген визасини тақиқлашни талаб қилади

Жаҳон 13:02 / 13.08.2022 3127

2022 йилнинг иккинчи ярмида ЕИга раислик қилаётган Чехия ҳукумати Украинада давом этаётган уруш фонида РФ фуқароларига шенген визаси берилишини тақиқлаш чақириқларини қўллаб-қувватлайди ва бу чорани амалга оширишга ҳаракат қилади. Чехия ташқи ишлар вазири Ян Липавский август ойи охирида бўлиб ўтадиган ЕИ кенгаши йиғилишида бу масала бўйича консенсусга эришиш ниятида. Россия «бундай тажовузкор сиёсат оқибатларсиз қолмаслигини тушуниши керак», деди у 12 август, жума куни.

Аввалроқ, Прагада бўлиб ўтган ЕИ ТИВ раҳбарларининг норасмий учрашувида Липавский шенген визаси берилишини тақиқлашни «ўринли ва самарали чора» деб атаган эди. «Россия агрессияси даврида, унинг эълон қилинган чегаралари доимий равишда ўзгариб турибди, шу сабабли Россия фуқаролари учун оддий туризм ҳақида гап ҳам бўлиши мумкин эмас», деди у Чехиянинг Novinky интернет-нашрига берган интервьюсида.

Украина президенти Володимир Зеленский 8 август куни The Washington Post газетасига берган интервьюсида Ғарбни барча русларнинг ўз ҳудудига киришини тақиқлашга чақирди. Россияга қарши илгари киритилган барча санкциялар Россия фуқаролари учун чегараларни бир йилга ёпиб қўйиш ва Россиядан энергия ташувчиларни сотиб олишга тўлиқ эмбарго жорий қилиш билан солиштирганда «заиф», деди у. Шу билан бирга, Зеленский бу чора Украинадаги урушга рози бўлмагани учун мамлакатни тарк этган россияликларга ҳам таъсир қилиши кераклигини таъкидлади. «Гап қайси руслар ҳақида кетаётган бўлмасин, уларни Россияга қайтариб юборинг. Шунда улар тушуниб етишади», - дея қўшимча қилди у ва РФнинг барча фуқаролари ҳокимиятнинг хатти-ҳаракатлари учун жавобгар бўлиши кераклигини таъкидлади. 

Шундан сўнг Еврокомиссия хорижликларга қисқа муддатли шенген визалари беришни тақиқловчи ҳуқуқий норманинг йўқлигига ишора қилиб, россияликларга визалар беришни бутунлай тўхтатиш ЕИ стандартларига зид эканини билдирди. 

Чехия Эстония, Латвия ва Литва билан биргаликда РФ фуқароларига визалар беришга жиддий чекловлар киритди, шунингдек, август ойи охирида россияликларга шенген визаларини беришни чеклаш масаласини ЕИ кенгаши муҳокамасига олиб чиқади. 

Кўпроқ янгиликлар