Кадастр агентлиги чалғитувчи рақамлар асосида тизимда коррупцияга қарши қаттиқ курашилаётганини иддао қилди

Ўзбекистон 20:34 / 13.08.2022 10243

2022 йилнинг 7 ойида кадастр соҳасидаги коррупция билан боғлиқ 28та ҳолатда жиноят ишлари қўзғатилган, дея ахборот берди кеча, 12 август куни АОКАда бўлиб ўтган брифингда Кадастр агентлиги матбуот котиби Неъматжон Атамуродов.

“Агар ушбу кўрсаткични ўтган 2021 йил билан солиштирадиган бўлсак, ўтган 2021 йилда бу кўрсаткич 55 тани ташкил этган бўлиб, бу соҳада коррупциянинг олдини олиш борасида сезиларли даражада ишлар олиб борилаётганини кўриш мумкин”, – деди у.

Kun.uz мазкур баёнотда 2022 йилнинг 7 ойидаги рақамлар 2021 йилнинг тўлиқ даври билан таққосланганига эътибор қаратди. Натижада кадастр тизимида коррупцион жиноятлар бир йилда гўёки 2 баробарга камайгандек таассурот уйғонади.

Ўтган йилнинг август ойида агентликнинг ўша пайтдаги директори Фазлиддин Умаров 2021 йилнинг 6 ойида кадастр тизимидаги мансабдорлар устидан 24 та жиноят иши очилганини маълум қилганди.

Агентлик матбуот хизмати билан боғланганимизда 2021 йил давомида 55та ҳолат аниқланганини тасдиқлади. Агар шундай бўлса, нега ўтган йилнинг бутун даври билан жорий йилнинг 7 ойи солиштирилиб, коррупцион жиноятлар камайгани иддао қилинмоқда, деган савол туғилади.

Агентлик матбуот хизмати 2021 йилнинг 7 ойи бўйича рақамларни тақдим этишга оид сўровимизни рад қилмади ва тайёрлаб берилишини маълум қилди.

Ҳозирча очиқ манбалардаги рақамлар кадастр соҳасидаги коррупцион ҳолатларда деярли ўзгариш бўлмаганини кўрсатмоқда:

  • 2021 йилнинг дастлабки 6 ойида 24 та жиноят иши;
  • 2022 йилнинг дастлабки 7 ойида 28 та жиноят иши.

Маълумотларни таққослаш мақсадида, айни мавзу бўйича ахборот беришни сўраб Коррупцияга қарши курашиш агентлиги матбуот хизмати раҳбари Дурдона Очилова билан ҳам боғландик. Бироқ бундай маълумотларни Кадастр агентлигининг ўзидан сўраш керак, деган жавобни олдик.

100дан зиёд давлат органлари ва ташкилотлари коррупцияга қарши ички назорат – комплаенс назорат олиб боряпти. Шу сабабли Кадастр агентлигидаги маълумотлар ва биздаги маълумотлар бир хил бўлади. Уларнинг ўзидан сўрашингиз мумкин. Бунинг учун яна битта ташкилотни овора қилиш шарт эмас”, – деди Очилова.

Кўпроқ янгиликлар