Эстония президенти Нарвада Т-34 танкига ўрнатилган ёдгорликни демонтаж қилишга чақирди

Жаҳон 11:09 / 06.08.2022 4641

Эстониянинг Россия билан чегарадош Нарва шаҳрида Т-34 танкига ўрнатилган ёдгорлик айрим маҳаллий аҳолининг норозилигига қарамай демонтаж қилиниши керак. Бундай фикрни 5 август, жума куни Эстония президенти Алар Карис билдирди. «Агар яқинда Нарова қирғоғидаги танк ёнига тарихни тушунтирувчи белги қўйишнинг ўзи кифоя, деб ўйлаган бўлсам, энди бу етарли эмас. Иккинчи жаҳон уруши давридаги танкнинг ўрни Нарва ҳамда Нарва-Йиэсуу ўртасидаги йўлда эмас, балки музейда», дея Эстония раҳбарининг сўзларини келтирган ERR телерадиокомпанияси сайти.

Алар Кариснинг сўзларига кўра, РФ президенти Владимир Путин буйруғи билан бошланган Россиянинг Украинага ҳужуми «Европадаги, жумладан Эстониядаги кўплаб Иккинчи жаҳон уруши ёдгорликларининг маъносини ўзгартирди». «Нарова қирғоғидаги Т-34 танки энди фақат 1944 йил воқеалари - немис қўшинлари чекиниши, Қизил Армия ҳужуми, ҳалок бўлган аскарлар ва хорижий ҳукмронлик остида қолган Эстонияни англатмайди. Кўплаб эстонияликлар учун бу эски танк Россия қўшинларининг Украина шаҳар ва қишлоқларига қилган фалокатли ҳужумлари рамзига айланди. Мен ҳам шундай деб ўйлайман, сабаби деярли худди шундай танклар Украинага қандай оғриқ ва қайғу келтираётганини ўзим кўрдим. Бундай рамзий нарса биздаги жамоат жойига тўғри келмайди», дея таъкидлади президент.

Бир кун аввал Эстония ҳукумати «имкон қадар тезроқ» барча совет ёдгорликларини жамоат жойларидан олиб ташлашга қарор қилди. Ҳисоб-китобларга кўра, мамлакатда уларнинг сони 200 тадан 400 тагача. Нарвадаги Т-34 танки ёдгорлигига алоҳида эътибор берилган. 90 фоиз русийзабон аҳолига эга шаҳарнинг кўплаб фуқаролари ёдгорлик бузилишига қарши, Эстония бош вазири Кая Каллас эса ёдгорликнинг музейга кўчирилиши ижтимоий кескинликни келтириб чиқариши мумкинлигидан хавотир билдирди. Бироқ Каллас ҳукумат операция учун «масъулиятни ўз зиммасига олиши» керак, деб ҳисоблайди. 

Эстония ҳукумати 2007 йилда Иккинчи жаҳон урушида ҳалок бўлган совет аскарлари ёдгорлиги - «Бронза аскар»нинг бошқа жойга кўчирилиши фонида бошланган тартибсизликлар мамлакатда яна такрорланиши мумкинлигидан хавотирда. Ўшанда русийзабон аҳолининг оммавий намойишлари натижасида бир киши ҳалок бўлди. Эстония ТИВ раҳбари Урмас Рейнсалу «танк бир ой ичида олиб ташланиши керак», агар керак бўлса, бунинг учун парламентнинг навбатдан ташқари йиғилишини чақириши лозим, деди. Унинг сўзларига кўра, агар ҳукумат Нарвадаги Т-34 танки билан боғлиқ можаронинг чўзилиб кетишига йўл қўйса, бу худди шундай оқибатларга олиб келиши мумкин. 

Кўпроқ янгиликлар