O‘zbekistonning Shvetsiyadagi yangi elchixonasining birinchi diplomati Stokholmga yetib bordi, deb xabar bermoqda “Dunyo”.

Diplomatik missiya maslahatchisi lavozimiga tayinlangan Nodir G‘aniyev O‘zbekistonning Shvetsiya qirolligidagi muvaqqat ishlar vakili vazifasini bajaradi.

U Farg‘ona shahrida tug‘ilgan, 50 yoshda. 1993 yil Toshkent davlat universitetini (hozirgi Milliy universitet) filolog-sharqshunos mutaxassisligi bo‘yicha tamomlagan. 1994 yildan buyon Tashqi ishlar vazirligi tizimida faoliyat yuritib, markaziy apparatda va mamlakat xorijdagi diplomatik vakolatxonalarida turli lavozimlarda ishlagan.

Shvetsiyaga jo‘nab ketishdan oldin u Tashqi ishlar vazirligi Yevropa mamlakatlari va YeI institutlari bilan hamkorlik boshqarmasi boshlig‘i lavozimida ishlagan.

Stokholmdagi diplomatik vakolatxona O‘zbekistonning xorijiy davlatlardagi 36-elchixonasi bo‘ladi.