Ўзбекистонда йилига 7 миллион тонна маиший чиқинди чиқади. Уларнинг бор-йўғи 26 фоизи қайта ишланади

Ўзбекистон 19:20 / 05.08.2022 3404

5 август куни бўлиб ўтган Сенат ялпи мажлисида 2022 йилги давлат дастурининг I ярим йилликдаги ижроси юзасидан ҳукумат ҳисоботи эшитилди. Мажлисда сенаторлар ҳукуматдан чиқиндиларни йиғиш ва қайта ишлаш масаласи дастурида белгиланган ишлар қай тарзда кетаётгани ҳақида сўради.

Саволга Экология ва атроф-муҳитни муҳофаза қилиш давлат қўмитаси раисининг биринчи ўринбосари Умарбек Халилов жавоб берди.

“Ҳақиқатан ҳам, давлат дастурининг 292-бандида маиший чиқиндиларни йиғишни 100 фоизга, уни қайта ишлашни 21 фоиздан 50 фоизга етказиш бўйича талаб белгиланган. Бу вазифаларнинг ижро механизмини қарайдиган бўлсак, алоҳида дастур ишлаб чиқиб, келаси 5 йилда амалга ошириш белгиланганини кўриш мумкин.

Бугунги кунда республикада йил давомида 7 миллион тонна маиший чиқинди чиқади. 307 та қайта ишловчи корхоналар томонидан уларнинг бор-йўғи 1,8 миллион тоннаси ёки 26 фоизи қайта ишланади. Ундан 1400 тонна маҳсулот ишлаб чиқарилади. Йил якунига қадар буни эллик фоизга чиқариш имконияти йўқ.

Шунингдек, 2022 йил 2 февраль куни президент Шавкат Мирзиёев томонидан ўтказилган йиғилишда маиший чиқиндиларни йиғишни 95 фоизга, қайта ишлашни 40 фоизга етказиш бўйича 2022-2025 йилларга мўлжалланган «Санитар тозалаш ишларини ташкил этиш ва аҳоли ҳудудларида тозаликни таъминлаш бўйича қўшимча чора-тадбирлар тўғрисида»ги қарор лойиҳаси ишлаб чиқилиб, тегишли вазирлик ва идоралар билан келишилди ва Вазирлар Маҳкамасига киритилди.

Унга асосан 2022-2025 йилларда:

  • 29 та маиший чиқинди полигонларини реконструкция қилиш;
  • 437 та чиқиндиларни йиғиш майдончаларини қуриш;
  • 26 та қурилиш чиқинди ва полигонларини қуриш ва жиҳозлаш;
  • 18 минг 867 та контейнерларни харид қилиш;
  • 60 та тиббиёт участкаларини қуриш ва техник воситалар билан таъминлаш;
  • 38 та қайта юклаш станцияларини қуриш, уларни 164 та махсус техника ва 181 та йирик ҳажмли контейнерлар билан таъминлаш;
  • 40 та чиқинди саралаш ускуналарини ўрнатиш мақсад қилиб олинган.

Мана шу тадбирларнинг амалга оширилиши натижасида [маиший чиқиндини қайта ишлашни] 40 фоизгача етказиш бўйича олдимизга мақсад қилиб қўйганмиз. Президентимиз томонидан ушбу ҳужжат имзолангач бу ишларни амалга оширишимиз мумкин.

Ҳақиқатан ҳам бугунги кунда тиббиёт чиқиндилари бўйича жудаям муаммоларимиз кўп. Шунинг учун, бу 60 та тиббиёт участкасини қуриш натижасида тиббий чиқиндиларнинг утилизацияси масаласи кўриб чиқилади”, – дея Экоқўм масъулининг сўзларини келтирмоқда Kun.uz мухбири.

Умарбек Ҳалиловнинг қўшимча қилишича, маиший чиқиндиларни 100 фоиз йиғиб олиш ҳақида фикрлар самарадорлик нуқтайи назаридан ҳақиқатга тўғри келмаслиги мумкин. Шунинг учун бу борада 95-96 фоизлик марра қўйилган.

Кўпроқ янгиликлар