AQSh maymun chechagi tufayli favqulodda holat e’lon qildi

Jahon 08:11 / 05.08.2022 9621

Qo‘shma Shtatlar maymun chechagi kasalligi tufayli sog‘liqni saqlash sohasida favqulodda holat e’lon qildi. Bu haqda 4 avgust, payshanba kuni AQSh sog‘liqni saqlash va aholiga xizmat ko‘rsatish vaziri Xaver Beserra ma’lum qildi.

«Biz virusga qarshi reaksiya bildirishni yangi bosqichga ko‘tarishga tayyormiz va har bir amerikalikni maymun chechagi kasalligiga jiddiy yondashishga chaqiramiz», dedi u telefon brifingi davomida. 

Sog‘liqni saqlash sohasida favqulodda holat e’lon qilinishi mamlakat rasmiylariga kasallik bilan kurashish uchun qo‘shimcha mablag‘ va mutaxassislarni jalb qilish imkonini beradi. Avvalroq maymun chechagi tufayli FH rejimi Nyu-York, Kaliforniya va Illinoys shtatlarida joriy qilingan edi. 

AQSh maymun chechagi kasalligi eng ko‘p qayd etilgan mamlakat hisoblanadi. AQSh Kasalliklarni nazorat qilish va oldini olish federal markazlari (CDC) ma’lumotiga ko‘ra, mamlakatda 7 000 ga yaqin holat qayd etilgan. 

Iyul oyida Jahon sog‘liqni saqlash tashkiloti (JSST) maymun chechagi tarqalishini xalqaro ahamiyatga molik favqulodda holat deb e’lon qildi. O‘sha vaqtga kelib 75 mamlakatda 16 000 dan ortiq holatlar haqida ma’lum edi. Kasallanish holatining aksariyati Yevropa va Amerikada aniqlangan. 

Tadqiqotchilarning ta’kidlashicha, ushbu kasallik an’anaviy ma’noda jinsiy yo‘l bilan yuqadigan infeksiya emas, u har qanday yaqin jismoniy aloqa orqali yuqishi mumkin. «Biroq, bizning ishimiz shuni ko‘rsatadiki, hozirgi kunga qadar yuqtirish holatlarining aksariyati, birinchi navbatda, erkaklar orasida ko‘p kuzatilmoqda», dedi tadqiqot rahbari Jon Tornhill. 

Kasallik tarqalishiga qarshi kurashish uchun JSST bosh direktori Tedros Adxanom Gebreyyesus kasallik tasdiqlangan guruhlar bilan bog‘lanishni, epidemiologik nazorat va sog‘liqni saqlash choralarini kuchaytirishni, kasalxonalarda infeksiyaning oldini olish ishini kengaytirishni, vaksinalar, terapevtik vositalardan foydalanish bo‘yicha tadqiqotlarni jadallashtirishni tavsiya qildi. 

Ko‘proq yangiliklar: