АҚШ Сенати Финландия ва Швециянинг НАТОга киришини маъқуллади

Жаҳон 13:08 / 04.08.2022 3452

АҚШ Сенати Финландия ва Швециянинг НАТОга киришини маъқуллади. 3 август, чоршанба куни Конгресснинг юқори палатаси кўпчилик овоз билан Шимолий Атлантика альянсини кенгайтиришни ёқлаб овоз берди: 95 сенатор блокда иштирок этувчи давлатлар сонини кўпайтириш тарафдори бўлди, фақат бир нафари бунга қарши чиқди. «Ушбу тарихий овоз бериш Қўшма Штатларнинг НАТОга бўлган давомий, холис содиқлиги ҳамда альянсимизнинг бугунги ва эртанги муаммоларга тайёрлигидан далолат беради», - деди АҚШ президенти Жозеф Байден. 

Шу тариқа, НАТОга аъзо 30 давлатдан 23 таси, шу жумладан Германия Финландия ва Швецияни қабул қилишга рози бўлди. Уларнинг иттифоққа кириши тўғрисидаги ҳужжатлар альянснинг барча аъзолари томонидан ратификация қилиниши керак. Шундан кейингина шимолий Европадаги мамлакатларнинг иккаласи ҳам НАТО низомининг коллектив мудофаа тамойилини тавсифловчи 5-моддаси билан ҳимояланади. 

Швеция ва Финландия май ойида Россиянинг Украинага ҳарбий бостириб кириши муносабати билан анъанавий бетарафликдан воз кечиб, НАТОга аъзо бўлиш учун ариза берди. Альянс икки давлатни НАТОга қабул қилиш тартибини июнь ойи охирида Туркия президенти Ражаб Тоййиб Эрдўған Швеция ва Финландиянинг иттифоққа қўшилишига қарши эътирозларини қайтариб олганидан сўнг бошлаган эди. 

Расмий Анқара Ҳелсинки ва Стокҳолмдан курд экстремистлари ва 2016 йилдаги давлат тўнтаришига уринишда гумон қилинганларни экстрадиция қилишни талаб қилди. Кейинроқ Эрдўған Швецияни бу ваъдаларни бажармасликда айблади. 

Кўпроқ янгиликлар