Qashqadaryo viloyati IIB axborot xizmatining xabar berishicha, 2022 yil 18 iyul kuni soat taxminan 12:00 larda Kitob tumani, Samarqand mahallasida yashovchilar o‘rtasida shaxsiy adovat zamirida janjal yuzaga kelgan. Janjal davomida tan jarohatlari olgan ikki nafar fuqaro Kitob tumani markaziy shifoxonasiga murojaat qilgan.

Shundan so‘ng o‘sha kuni soat 15:30 larda shifoxona hovlisida to‘plangan jabrlangan fuqarolarning qarindoshlari o‘rtasida janjal va mushtlashuv kelib chiqqan.

Janjal jarayonida fuqaro P.B. avtomashinasida bo‘lgan pichoq bilan fuqarolar Q.I. va O.A.ga tan jarohati yetkazgan. 

Qayd etilishicha, hozirda mazkur holat yuzasidan Kitob tuman IIB tomonidan Jinoyat kodeksining 277-moddasi 3-qismi “g” bandi bilan jinoyat ishi qo‘zg‘atilgan. Janjalda qatnashib, bir-birini do‘pposlagan va tan jarohatlari yetkazgan 7 nafar shaxs JPKning 221-moddasiga asosan protsessual tartibda ushlangan.