Samarqand viloyati IIB axborot xizmatining Kun.uz’ga xabar berishicha, 2022 yil 26 iyun kuni soat 15:30 larda Past Darg‘om tumani Baxshivoyi mahallasi hududidan o‘tgan ichki yo‘lda odam o‘limi bilan bog‘liq yo‘l-transport hodisasi sodir bo‘lgan.

19 yoshli yigit o‘z boshqaruvidagi Nexia bilan ketayotib qoidalarni buzgan holda o‘zidan oldinda ketayotgan mashinasini quvib o‘tmoqchi bo‘lganda qarama-qarshi tomondan kelayotgan Labo mashinasi bilan to‘qnashgan.

Oqibatda, Labo mashinasining 33 yoshli haydovchisi og‘ir tan jarohatlari olib, shifoxonaga yotqizilgan. Ammo shifokorlar tomonidan ko‘rsatilgan muolajalarga qaramasdan u vafot etgan.

Surishtiruvlarda, ikkala haydovchi ham haydovchilik guvohnomasiga ega emasligi aniqlangan.

Qayd etilishicha, holat yuzasidan Past Darg‘om tumani IIB tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Hozirda tergov-surishtiruv harakatlari olib borilmoqda.

Avvalroq, Samarqandda tezlik qoidalarini buzib harakatlangan Nexia haydovchisi sodir etgan YTHda 52 yoshli ayol vafot etgandi.