Buyuk Britaniya bosh vaziri Boris Jonson Ukrainaga Rossiya bilan uning manfaatlariga mos kelmaydigan sulh tuzishi uchun bosim o‘tkazishlari mumkinligidan xavfsiramoqda.

Jonsonning so‘zlariga ko‘ra, Yevropaning ko‘plab davlatlari Ukrainadagi urushning iqtisodiy oqibatlaridan xavotirlanmoqda. U gap qaysi mamlakatlar to‘g‘risida borayotganini aytmadi.

«Juda ko‘p mamlakatlar bu Yevropaga keraksiz urush demoqda va shu sababli ukrainaliklarni yomon sulh tuzishga chaqirish, ehtimol, majbur qilish uchun bosim kuchayadi»,— dedi Buyuk Britaniya bosh vaziri.

Uning fikricha, agar Rossiya prezidenti Vladimir Putin «Ukrainada o‘z maqsadiga erishsa», buning oqibatlari «xalqaro xavfsizlik uchun xavfli bo‘ladi» hamda «uzoq muddatli iqtisodiy falokatga aylanadi».

Boris Jonson G7 va NATO mamlakatlarini Ukrainadagi voqealardan «charchoq» paydo bo‘lganiga qaramasdan Rossiyaga yon bermaslikka chaqirdi.