Ўзбекистон Ерни масофадан зондлаш сунъий йўлдошини ишлаб чиқмоқчи

Ўзбекистон 11:10 / 24.06.2022 3221

“Ўзбеккосмос” агентлиги ишчи гуруҳи Франциянинг Тулуза шаҳрига ташрифи доирасида “Airbus Defence & Space” компанияси космик ерусти инфратузилмаси, геоахборот маълумотларини қайта ишлаш маркази билан танишди

Марказ Ерни масофадан зондлаш учун қўлланиладиган 6 та оптик ва 3 та радарли сунъий йўлдошдан иборат бўлган сунъий йўлдош туркумини бошқариш станциясидан иборат. Ушбу станция барча парвозларни бошқариш, сунъий йўлдош орбиталарини бошқариш ва суратга олиш бўйича вазифаларни белгилаш асосий нуқтасидир. Тақдимот чоғида бутун дунё бўйлаб ерусти станциялари кўп бўлишига қарамай, улар барчаси қабул қилиш учун ишлаши ва фақат шу станция сунъий йўлдошларни бошқариш имкониятига эга экани таъкидланди.

Кейинчалик ерни масофадан зондлаш сунъий йўлдошларидан маълумотларни қабул қилиш учун мўлжалланган ерусти станцияси кўрсатилди. Станция диаметри 5,5 метр бўлиб, уни ташқи муҳит таъсиридан ҳимоя қилувчи гумбаз мавжуд. Ерусти станцияси 2300 км.гача ишлаш радиусига эга, бу антенна ишлаш радиусида учувчи бир нечта сунъий йўлдошлардан маълумотларни қабул қилиш имконини беради.

Кейинчалик, сунъий йўлдошлардан олинган маълумотларни қайта ишлаш бўйича сегмент намойиш этилди. Маълумотлар пиксел йиғиш, созлаш, геобоғлаш каби бир қатор ишлов бериш босқичларидан ўтади. Сегмент сўров бўйича ишлов берилмаган тасвирлар ёки тайёр ортофотолар, рельеф ва ҳудуд рақамли модели, 3D ер моделларини тақдим этиши мумкин. Қабул қилинган маълумотлар таҳлил сегментига ўтказилади. 

Марказ қишлоқ, сув хўжалиги, ўрмон хўжалиги, экология, геология, ердан фойдаланиш каби турли соҳалардаги муаммоларни ҳал қилиш учун ерни масофадан зондлаш маълумотларини қайта ишлаш кўникмаларини намойиш этади. 

Франция томони таклифи асосида виртуал станциядан фойдаланиш орқали ерусти станциясини жойлаштириш бўйича маслаҳатлашувлар ўтказилди. Лойиҳани амалга ошириш умумий муддати барча техник ҳужжатларни тасдиқлаш, ўрнатиш ва ишга тушириш, агентлик мутахассисларини ўқитиш муддатларини ҳисобга олган ҳолда камида 2 йилни ташкил этади. 

“Airbus DS GEO Intelligence” компанияси сунъий йўлдош туркуми доирасида Ўзбекистон манфаатлари учун Ерни масофадан зондлаш сунъий йўлдошини яратиш имконияти муҳокама қилинди. Ушбу механизм компания Ўзбекистон ҳудудидаги барча туркумларига эксклюзив эгалик ҳуқуқини ва Ўзбекистон сунъий йўлдошидан “Airbus DS GEO Intelligence” компанияси орқали маълумотларни биргаликда сотиш имконини беради.

Агентлик томонидан маҳаллий мутахассислар малакаси ва техник салоҳиятини ошириш муҳимлигини таъкидлади. “Airbus DS GEO Intelligence” компанияси агентлик ходимлари учун қисқа курслар ўтказиш имкониятини тасдиқлади.

Кўпроқ янгиликлар