22 iyun kuni Toshkent shahri Bunyodkor stadioni atrofida obodonlashtirish xodimlari bilan “Maslahat, nasihat, iltimos” shiori ostida noodatiy piket o‘tkazilgan. Unda ishchilar odamlarni ko‘chaga chiqindi tashlamaslikka targ‘ib qiladigan so‘zlar yozilgan bannerlar ko‘tarib olishgan.

G‘oya muallifi, ekobloger Mo‘tabar Xushvaqtova piket va bunga aholining munosabati haqida Kun.uz’ga gapirib berdi. 

“Yaqinda bir homiyga obodonlashtirish xodimlariga xayriya sifatida nok tarqatishda yordamlashdim. Shu orada o‘zim anchadan beri o‘ylab yurgan piketni ham tashkillashtirdik. Obodonlashtirish xodimlariga berilgan bannerlar oldindan tayyor edi. Ishchilarga bu nima maqsadda qilinayotgani, bannerda nima deb yozilgani hammasi tushuntirilgan. Ular buni yaxshi qabul qilishdi, xursand bo‘lishdi”, – deydi u.

Mo‘tabarning aytishicha, bu virusli xabar bo‘lib, juda ko‘pchilik ijtimoiy tarmoqdagi sahifalariga qo‘ygan. Lekin biroz dilni xira qiladigan tomoni, rasmlarni tarqatayotganlar mualliflik huquqini saqlamasdan, o‘z kanallari, ijtimoiy sahifalari nomidan e’lon qilib yuborishgan.

“Nima bo‘lganda ham bu post odamlarni ekologiya, tozalikka e’tiborga o‘rgatadi, deb o‘ylayman”, – deydi ekobloger.