Бу ҳақда Халқаро валюта жамғармаси (ХВЖ) ҳисоботида айтилган.
2020 йилдаги пандемия савдо, туризм ва транспортда кескин пасайишга олиб келди. Бироқ, реал ўсиш 1,9 фоизлик ижобий даражада қолди. Йил охирида инфляция 11 фоизга тушди.
2021 йилда иқтисодий ўсиш 7,4 фоизни ташкил этди. Глобал нархлар босимига қарамай, қатъий пул-кредит сиёсати инфляцияни 2021 йил охирига келиб 10 фоизга туширишга ёрдам берди.
Савдо ва пул ўтказмаларининг қайта тикланиши билан жорий операциялар тақчиллиги бироз ошиб, ЯИМнинг 7 фоизини ташкил этди. Ижтимоий ёрдам, инвестициялар ва кредитлар кўринишидаги давлатнинг иқтисодий қўллаб-қувватланиши бюджетнинг умумий тақчиллигини 2 фоиз пунктга ошириб, ЯИМнинг 6,2 фоизига тенг бўлди.
Ўзбекистоннинг Россия билан яқин иқтисодий алоқалари ҳисобга олинса, 2022 йил учун истиқболлар Украинадаги уруш оқибатлари ва Россияга қарши санкцияларга боғлиқ бўлади. Россияда пул ўтказмалари, савдо ва молиялаштиришнинг секинлашиши, 2022 йилда ўсишни 3-4 фоизга қисқартириши ва жорий операциялар тақчиллигини 8,5 фоизгача ошириши кутилмоқда.
Инфляция 10 фоиздан юқори бўлиб қолиши кутилмоқда, чунки глобал озиқ-овқат ва хомашё нархлари юқорилигича қолмоқда, аммо ноаниқлик ҳам юқори даражада турибди.
ХВЖ давлат корхоналари билан боғлиқ бўлиши мумкин бўлган фискал рискларни бартараф этган ҳолда, даромадларни ошириш ва рентабелликни кўпайтиришни давом эттириш зарурлигини таъкидлади.
Молиявий барқарорликни таъминлаш учун Марказий банкнинг назорат ва макропруденциал тизимини ҳам кучайтириш, банклар фаолиятини яқиндан кузатиб бориш тавсия этилган.
