Тошкент вилоятида маданий мерос объектларига зарар етказган ва миллионларни ўзлаштирган мансабдорлар аниқланди

Ўзбекистон 09:32 / 23.06.2022 7789

Маданият вазирлиги ҳузуридаги «Марказлашган инвестициялар ҳисобидан молиялаштирилувчи объектларни қуриш, реконструкция қилиш, мукаммал ва жорий таъмирлаш бўйича буюртмачи хизмати» давлат муассасаси ҳамда «Антиқа ва сифатли қурилиш» хусусий корхонаси ўртасида 2020-2021 йилларда Бўстонлиқ туманида жойлашган «Шайх Умар Вали Боғистоний» зиёратгоҳини таъмирлаш-тиклаш ишлари бўйича 1,7 млрд сўмлик пудрат шартномаси имзоланган.

Фото: ЎзА

ЎзА хабарига кўра, буюртмачи хизмати давлат муассасаси ва ХК мансабдор шахслари таъмирлаш ишлари бўйича тузилган ҳисоб-фактураларга сохта маълумотлар киритиб, ҳақиқатда бажарилмаган ишларни қўшиб ёзиш орқали 402,7 млн сўмлик бюджет маблағларини ноқонуний ўзлаштирган.

Мазкур ҳолат юзасидан Жиноят кодекси 167- (Ўзлаштириш ёки растрата йўли билан талон-торож қилиш) ва 209-моддалари (Мансаб сохтакорлиги) билан жиноят иши қўзғатилган.

Тошкент вилояти Қибрай туманидаги «Қиличли ота» зиёратгоҳида қайта таъмирлаш ва тиклаш ишлари бўйича вилоят ҳокимлиги «Ягона буюртмачи хизмати» инжиниринг компанияси ва «TOSHMELIOQURILISH» МЧЖ ўртасида шартнома тузилиб, 309 млн 107 минг сўм бюджет маблағи ажратилган.

«Ягона буюртмачи хизмати» инжиниринг компанияси ва «TOSHMELIOQURILISH» МЧЖ мансабдор шахслари ўзаро тил бириктириб, бажарилган қурилиш ишлари бўйича тузилган ҳисоб-фактураларга сохта маълумотлар киритиб, ҳақиқатда бажарилмаган иш ҳажмларини қўшиб ёзиш орқали 263 млн 286 минг сўмлик бюджет маблағларини ноқонуний ўзлаштирган.

Мазкур ҳолат юзасидан Тошкент вилоят ҳокимлигининг «Ягона буюртмачи хизмати» инжиниринг компанияси ва “TOSHMELIOQURILISH” МЧЖ мансабдор шахсларига нисбатан Жиноят кодекси 167- (Ўзлаштириш ёки растрата йўли билан талон-торож қилиш) ва 228-моддалари (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари олиб борилмоқда.

Фото: ЎзА

Қибрай туманидаги «Бузган тепа» археология ёдгорлиги ён қисмларида маиший хизмат кўрсатиш шохобчалари ва бошқа бинолар қуриш бўйича ишлар олиб борилиши натижасида ушбу моддий маданий мерос объектига 5 млрд 668 млн сўмлик зарар етказилган.

Ҳозирда ҳолат юзасидан Жиноят кодекси 132- (Моддий маданий мерос объектларини нобуд қилиш, бузиш ёки уларга шикаст етказиш) ва 205-моддалари (Ҳокимият ёки мансаб ваколатини суиистеъмол қилиш) билан жиноят иши қўзғатилиб, тергов ҳаракатлари олиб борилмоқда.

Кўпроқ янгиликлар