BRIKS mamlakatlari BMT Xavfsizlik kengashi va Jahon savdo tashkiloti isloh qilinishini qo‘llab-quvvatlaydi. Bu haqda xalqaro uyushma sammiti yakunlari bo‘yicha qabul qilingan qo‘shma deklaratsiyasida ma’lum qildi.

Deklaratsiyaga ko‘ra, BRIKS mamlakatlari xalqaro tizimda BMTning markaziy rolini saqlab qolish tarafdori. Shu bilan birga, BRIKS «BMT Xavfsizlik kengashini isloh qilish borasidagi munozaraga yangi hayot bag‘ishlashga tayyor». 

Ta’kidlanishicha, Xitoy va Rossiya Braziliya, Hindiston va JARning «BMTda yanada sezilarli rol o‘ynashga urinishi»ni qo‘llab-quvvatlaydi. 

Bundan tashqari, BRIKS mamlakatlari Jahon savdo tashkilotining ishini o‘zgartirishga chaqirdi. 

Shuningdek, BRIKS mamlakatlari Jahon savdo tashkilotini «JST ruhi va qoidalariga zid keluvchi bir tomonlama va proteksionistik choralarni qo‘llamaslikka» da’vat qildi. 

BMT Xavfsizlik kengashiga AQSh, Rossiya, Buyuk Britaniya, Fransiya va Xitoy kiradi.

Avvalroq Turkiya prezidenti Rajab Toyyib Erdo‘g‘an BMT tizimini isloh qilish vaqti kelganini aytgandi.

«BMTga a’zo 193 mamlakat taqdirini besh mamlakat belgilaydigan tizim adolatdan emas. Tizim qayta isloh qilinishi kerak. Dunyodagi mamlakatlar beshtadan ko‘pligini gapirganimizda butun insoniyatning huquq va umumiy manfaatlarini himoya qilishga urinamiz, buni o‘z mamlakatimiz manfaati uchun gapirmaymiz», - degandi u.